O Instituto Galego de Análise e Documentación Internacional (Igadi) presentou este luns, en rolda de prensa, o proxecto Xacobeo 2021 e a Ruta da Seda: Camiños para o diálogo Oriente-Occidente, no que colabora o Concello de Pontevedra para promover as relacións de Galicia con China.
Segundo explicou o director do Igadi e coordinador do proxecto, Daniel González, a iniciativa ten como obxectivo xeral promover as relacións de Galicia con China desde o contacto e o diálogo entre o Camiño de Santiago e a Ruta da Seda como itinerarios para o encontro multicultural.
Daniel González indicou que "o proxecto é froito da convocatoria O teu Xacobeo 2019" impulsada pola Consellería de Cultura, ao que se suman achegas para o seu financiamento dos concellos de Santiago, A Coruña, Pontevedra e Lugo.
Segundo comentou Daniel González, "o Igadi entende este proxecto como unha acción exterior oficial de Galicia ligada ao ideario de Nacións Unidas", polo que tamén se quere "implicar ás universidades, ás Cámaras de Comercio ou as entidades socioculturais" para formar parte desta rede e "conectarse máis e mellor a China".
ENFOQUE INTEGRAL
A sinóloga Marola Padín, técnica encargada da investigación neste proxecto, indicou que a intencionalidade explícita do proxecto procura un enfoque integral nas relacións de Galicia con China, "máis aló do posicionamento turístico do Xacobeo 2021".
"Non é un propósito atraer a moitos cidadáns chineses, somos conscientes de que en moitos sitios hai turismofobia e non é ese o noso obxectivo, senón dar a coñecer o Camiño de Santiago", sinalou.
O proxecto vai durar sete meses e durante este tempo aspira a identificar unha "rede de interese galego-chinesa" de natureza multidimensional: institucional, económica-comercial, académica e sociocultural ou turística, que funcione de intercambiador plural e eficaz para as relacións co xigante asiático no horizonte do século XXI.
En segundo lugar e despois da identificación dos actores fundamentais nas relacións de Galicia con China, o Igadi elaborará un estudo que identifique as fortalezas e debilidades, as oportunidades e as ameazas, das relacións Galicia-China, que impliquen a definición dun plan de actuación para o posicionamento de Galicia e o Xacobeo 2021 en China.
"INFORME FINAL"
Por último o proxecto finalizará coa presentación do "informe final" ao redor das relacións Galicia-China, nunha gran conferencia fixada para o venres 17 de abril de 2020, no Museo das Peregrinacións en Santiago de Compostela.
A concelleira de Promoción de Pontevedra, Anabel Gulías, concluíu que para o Concello de Pontevedra este proxecto "encaixa coa filosofía que este Concello ten sobre o que debe ser a acción exterior galega e o papel referencial que deben ter as cidades". Tamén sinalou que "se trata de potenciar un dos maiores atractivos da cidade", como é o Camiño Portugués.
