A cidade de Pontevedra completará este ano as obras vinculadas ao Camiño Portugués. Farao a través de catro actuacións que superan os 4,2 millóns de euros e que teñen un dobre obxectivo: mellorar a calidade urbana e a seguridade viaria tanto de veciños como de turistas e peregrinos. A relación de proxectos inclúen a peonalización da ponte do Burgo, que está a piques de acabar; a senda de Alba, que se executará antes de que finalice o ano, e as reformas de Virxe do Camiño e O Gorgullón, ambas as finalizadas en 2019.
A primeira das intervencións tivo lugar en Virxe do Camiño. A obra foi adxudicada á empresa Oresa por 1.146.785 euros e consistiu na humanización da rúa, o que supuxo a implantación da plataforma única para dar prioridade de paso aos peóns. As beirarrúas e a calzada pasaron a estar ao mesmo nivel para mellorar a seguridade viaria. Tamén se instalaron uns bolardos para evitar a circulación de vehículos. Estes elementos representaron en número os 64 quilómetros e 500 metros que hai entre este punto e a catedral de Santiago, nunha clara chiscadela á ruta xacobea.
A actuación tamén se completou coa restauración do cruceiro e a creación dunha praza con zonas de descanso e estancia para os viandantes. Esta última construción obrigou a elevar o firme, antes en desnivel, e a suprimir a antiga saída do tráfico rodado cara a Eduardo Pondal.
A seguinte obra no tempo foi a reurbanización da Rúa do Gorgullón, que executou a empresa EC Casas por 1.258.629,17 euros. Os traballos finalizaron en decembro do ano pasado e a rúa estreouse cunha festa organizada polo Goberno local. O 1 de decembro, decenas de veciños participaron na inauguración do viario, que conta con 9.000 leds de cor lavanda que marcan o paso do Camiño Portugués a Santiago.
A actuación levou a renovación de todos os servizos subterráneos, a implantación dunha plataforma única e a reordenación do tráfico, que se fixo en varias fases tras o descontento dos veciños polos problemas de acceso aos garaxes das súas vivendas.
EN EXECUCIÓN. O Concello tamén está a piques de finalizar un dos seus proxectos estrela: a peonalización da ponte do Burgo, que acumula meses de atraso. A obra dividiuse en dúas fases. A primeira foi realizada polas firmas Imesapi e EC Casas cun orzamento de 1.326.977 euros. Consistiu na reforma do viaduto, a renovación da antiga varanda e a creación dunha gran praza con bancos fronte á gasolineira.
A segunda parte da intervención, aínda pendente, é a instalación do novo sistema de iluminación. Custará 730.840 euros e del encargarase a empresa Setga.
A última gran obra do Camiño Portugués en Pontevedra impúlsaa a Xunta. E consiste na creación dunha senda peonil segura en Alba, na estrada que une San Caetano coa N-550. O actual viario non conta con beirarrúas e supón un punto negro para a seguridade do tráfico. A zona é paso obrigado dos peregrinos. A obra faraa Oresa por 478.385,29 euros. Terá seis meses para terminala.
