A publicación no BOE do decreto de disolución das Cortes e a convocatoria da eleccións xerais o 23 de xullo activou este martes o reloxo electoral e a carreira cara ás urnas.
En apenas 20 días os partidos terán que rexistrar ante as xuntas electorais as súas candidaturas ao Congreso e ao Senado. O prazo para facelo comeza o día 14 e finaliza o 19. Ademais, as posibles coalicións terán ata o 9 de xuño para formalizar a súa inscrición.
Todas estas circunstancias obrigan os partidos a pisar o acelerador e a abrir o seu propio calendario para a elección dos candidatos cos que concorrerán pola circunscrición de Pontevedra.
Tras os comicios celebrados o pasado domingo ábrese un amplo abanico de posibilidades e dáse por seguro que haberá cambios en todas as formacións con respecto ás listas dos anteriores xenerais. Na imaxe, os elixidos entón, aínda que non todos seguen nese cargo.
No Partido Socialista dáse por feito que haberá renovación e non se descarta que Carmela Silva, se ela quere, poida encabezar a lista do PSOE por Pontevedra.
Espéranse cambios tamén no Partido Popular, xa que se en 2019 a cabeza de lista foi María Ramallo ao concorrer Ana Pastor na candidatura por Madrid, a alcaldesa marinense renunciaba á acta o 31 de xaneiro de 2021 para centrarse no Concello. No Cámara baixa substituíuna o estradense Juan Constenla.
Outro deputado que podería non ir na lista é Javier Bas, que acaba de gañar as municipais en Redondela, pero que necesitaría pactar coa Agrupación de Electores por Redondela (AER) para ser elixido alcalde.
A que tampouco se presentará por Pontevedra dada a súa proxección nacional é Yolanda Díaz, que nestas eleccións será a candidata á presidencia do Goberno de Sumar, partido que acaba de inscribir. Este movemento cidadán deberá elixir candidatos na provincia, algo que non debería ser ningún problema, xa que tanto en Pontevedra como en Galicia Esquerda Unida e Podemos contan coas bases necesarias para conformalas.
Outra das incógnitas a resolver é quen encabezará na provincia a lista de Vox, que tanto hai catro anos como nas recentes municipais non conseguiu representación.
Precisamente, á vista dos resultados do 28-M, o BNG ten esperanzas de poder ampliar a súa presenza en Madrid tras os xenerais. Carme Dasilva
Se hai catro anos Ciudadanos presentaba como cabeza de lista a Beatriz Piñeiro, os malos resultados obtidos polo partido laranxa deron ao traste cos plans da candidata. A formación non se presentará a estes comicios.
9 de xuño
Ata ese día poderanse comunicar ás xuntas electorais as coalicións e alianzas que concorrerán aos comicios.
19 de xuño
Último día para a presentación das candidaturas ao Congreso e ao Senado.
7 de xullo
Ás 00.00 horas do 7 de xullo comezará a campaña electoral, que finalizará o venres 21.
22 de xullo
Xornada de reflexión.
23 de xullo
Xornada electoral na que poderán exercer o seu dereito ao voto máis de 36 millóns de persoas.
17 de agosto
Constitúense as Cortes Xerais e toman posesión os parlamentarios e elixirase aos membros das dúas Mesas. A investidura non se celebrará antes de finais dese mes.
