Nun contexto en que a Boa Vila acaba de recibir un impulso de tres millóns de euros de fondos europeos para o desenvolvemento do seu Plan de Sostibilidade Turística e o fomento do Xacobeo, Pontevedra pretende consolidarse na Feira Internacional Fitur 2022, que se celebrará en Madrid entre os días 19 e 23 de xaneiro, como capital española do turismo verde, gastronómico e deportivo.
Estes tres produtos turísticos de enorme peso e potencial serán os protagonistas da campaña que Turismo de Pontevedra exhibirá no Ifema o venres 21 de xaneiro, nunha presentación que terá lugar ás 12:30 horas no Stand de Turismo de Galicia (pavillón 9) e que incluirá a proxección dun vídeo promocional co slogan Non todo vai ser sufrir! e o hashtag #VenaPontevedra.
A campaña presentada pola edil Yoya Blanco inclúe o lanzamento dun vídeo promocional baixo o slogan 'Non todo vai ser sufrir!' e o hashtag #VenaPontevedra
A proposta foi presentada a pasada semana na Sala de Prensa do Teatro Principal un acto no que participaron a concelleira de Turismo, Yoya Blanco; o tenente de alcalde e concelleiro de Deportes, Tino Fernández, e o concelleiro de Desenvolvemento Sostible, Iván Puentes.
A edil socialista asegurou que, coincidindo coa chegada da Ave a Galicia e as subvencións Next Generation conseguidas co Goberno de Pedro Sánchez, "este será o gran ano de coroación de Pontevedra como xeodestino estrela de España".
Candidata a Capital Española da Gastronomía 2023
"Xa conseguimos o máis importante para arrincar este proxecto, que foi o entusiasmo e implicación do sector, coa creación dese all star de chefs locais que conforma a Banda Cociñas de Pontevedra e con padriños e madriñas de excepción, como o noso estrela Michelin Iñaki Bretal, o masterchef Carlos Maldonado –primeiro cociñeiro saído deste programa en conseguir unha Estrela Michelin– ou a investigadora e experta do Basque Culinary Center Eva Ballarín, e pronto daremos o seguinte paso: queremos converternos en Capital Española da Gastronomía 2023", adiantou Yoya Blanco.
A socialista afirma que, coincidindo cunha importante inxección de fondos europeos, "este será o gran ano da coroación da nosa cidade como xeodestino estrela de España"
Neste sentido, a concelleira de Promoción Económica e Turismo recibiu o pasado mércores pola mañá unha carta asinada polo presidente de Capital Española da Gastronomía (CEG), Mariano Palacín, e o seu director xeral, Pedro Palacios, na que confirman que Pontevedra participará o proceso de selección das candidaturas ao galardón de Capital Española da Gastronomía 2023. Na súa misiva, os máximos responsables da distinción aseguran que estarán "encantados" de participar nos actos promocionais organizados por Turismo de Pontevedra e Pontevedra Capital Gastro durante a Feira Internacional de Fitur.
Na proposición de candidatura que a Concellería de Promoción Económica e Turismo remitiulle aos responsables de CEG sublíñase que "Pontevedra ten todos os ingredientes necesarios para cociñarse como referente gastronómico galego, nacional e incluso internacional". Así, faise fincapé nos gastroeventos e iniciativas postos en marcha no marco do proxecto Pontevedra Capital Gastro: Festa das Cunchas (coa Batalla das Cunchas), Avoa Fest (con Desafío Filloa), Mestizaxes, cociñas de ida e volta, Capital Gastrolab, Mesa de Gastronomía, Premio Loureiro de Ouro, Banda Cociñas de Pontevedra, etc.
