O Concello repartirá máis de 4.000 plantas para embelecer os balcóns da cidade. Farao de forma gratuíta nunha nova edición do programa Ponteguapa, que comezará este venres na Praza da Peregrina a partir das 18.00 horas. Alí distribuiranse petunias, margaridas e outras especies con flor.
O concelleiro de Parques e Xardíns, Alberto Oubiña, informou este xoves en rolda de prensa que a xornada incluirá música en directo, talleres e repartición de compost. A repartición de plantas continuará os días 30 de marzo en Virxe do Camiño (11.00 horas), 5 de abril na Praza da Audiencia (18.00 horas), 6 de abril na Praza de José Martí (11.00 horas) e o 12 de abril na Praza do Hospital (18.00 horas).
A iniciativa tamén incluirá unha exposición de bonsáis do 3 ao 7 de abril na Casa dá Luz e un obradoiro sobre como transplantar e coidar esta planta ornamental de orixe xaponesa a cargo de Francisco José Simón Varela. Ademais impartiranse obradoiros sobre como coidar plantas e como decorar os balcóns o 4 e o 10 de abril nas Prazas de Ourense e nos Xardíns de Marescot, respectivamente. En caso de mal tempo, os talleres trasladaríanse á Casa da Luz.
Ponteguapa contempla ademais a creación dunha escultura de madeira nos Xardíns de Marescot, situados fronte ao Ambulatorio Virxe Peregrina e a Facultade de Belas Artes. Santiago Castro será o encargado de dar forma ao tronco dunha árbore tallada recentemente na zona. "Será a primeira obra de madeira en Pontevedra. E non será a última", dixo Oubiña, que avanzou que os traballos comezarán o 1 de abril e durarán aproximadamente un mes.
