Cambiar o planeta desde as accións máis locais. Este é o obxectivo da nova campaña impulsada polo Concello para achegar o seu granito de area na loita contra o cambio climático.
A iniciativa, Efecto PO2, chegará aos centros educativos de todo o municipio co obxectivo de concienciar "que o cambio real empeza no local". Así o avanzou este luns a concelleira de Promoción da Cidade, Anabel Gulías, durante a presentación deste proxecto, que reivindicará tamén o modelo urbano pontevedrés como motor desa "revolución ecolóxica".
As charlas nos institutos faranse en colaboración co Consello Superior de Investigacións Científicas (CSIC). Nelas abordaranse cuestións como a subida do nivel do mar e como iso está a afectar a contornas como a praia da Lanzada; os perigos dos monocultivos ou a xestión forestal.
As accións municipais non só faranse nos colexios, senón tamén a nivel político e social. Reclamarase un maior compromiso das administracións co cambio climático e participarase de forma activa nos actos da folga mundial polo clima, que se celebrará o 27 de setembro.
A edil de Promoción da Cidade asegurou que desde Pontevedra se levaron a cabo iniciativas para mellorar a calidade de vida da cidade, que cada vez recibe máis invitacións do estranxeiro para explicar como o seu deseño urbano, que aposta por gañar máis espazo para os peóns e reducir o tráfico rodado no centro, contribuíu a reducir a contaminación. "A emerxencia climática está hoxe na fala da xente. Cando nós comezamos as accións non se plantexaba nada disto", dixo Gulías sobre a decisión do Concello pór límites ao coche en 1999. Iso contribuíu, segundo os datos da edil do BNG, a reducir as emisións de CO2 nun 66%.
Gulías confirmou ademais que se encargará un estudo para medir a calidade ambiental de Pontevedra. O traballo farao a Universidade de Vigo a través do Observatorio Urbano de Pontevedra, que recolle distintas estatísticas que afectan á capital. A aposta pola compostaxe tamén formará parte da campaña municipal.