Pontevedra, a segunda urbe do país con menos risco de roubos de coches

Os tempos de delincuentes xuvenís facendo pontes e de coches coas portas marcadas por patas de cabra pasaron á historia hai décadas. Sexa polas crecentes medidas de seguridade nos turismos actuais ou porque os cacos teñen hoxe todas as papeletas de ser pillados se os revenden, a subtracción de vehículos leva en caída libre desde principios de século. Tanto que as forzas de seguridade avogaban pola extinción deste delito que, aínda que non chega, leva un lustro estancado en mínimos históricos.

En Galicia, segundo o balance de criminalidade do Ministerio do Interior, roubáronse 464 automóbiles o ano pasado, dos que 239 foron en Pontevedra, a terceira provincia de España con menos probabilidade de subtraccións de coche, só por detrás de Cantabria e Lugo. Así o acaba de revelar un estudo da patronal de aseguradoras, Unespa, que en base aos datos de roubos das compañías establece índices en comparación á media nacional, que marca como base co 0%.

E en Pontevedra hai menos da metade de risco de quedar sen coche que no conxunto do país: un 57,83% menos. Pouco máis hai na Coruña (-57,19%), mentres que en Lugo hai menos (-58,17%). Así, a Galicia marítima é superada unicamente por Cantabria (-59,64%), e de feito a comunidade (-53,55%) computa como a segunda con menor risco do país, só por detrás de Asturias (-56,88%).

Se non é a que menos propabilidades presenta é porque a provincia de Ourense (-41,01%) lastra a estatística, cunha diferenza que se explica pola proximidade a Portugal e o mercado ilícito de recambios roubados e chatarra que, a pesar de ser case testemuñal, segue dándose na Raia, tal e como constatan as forzas de seguridade.

GALICIA, MOI SEGURA. De todas as maneiras, Galicia é a cuarta comunidade máis segura se se atende ao global de delitos e as súas catro provincias tamén o son á hora de deixar o coche aparcado xa sexa en garaxes ou na rúa, onde actúan con máis frecuencia os amigos do alleo. Nada que ver, neste sentido, con Madrid (+65,70%) ou Barcelona (+37,92%).

Mención aparte merece Sevilla, onde hai case o dobre de probabilidades de roubo que no conxunto estatal (+87,62%) —algo que o estudo achaca á proliferación de barrios onde a venda de pezas roubadas está á orde do día—, e tamén Melilla, o punto do país onde máis probable é que desapareza un coche (+195,01%), un índice que Unespa atribúe " exportación a Marrocos de partes de vehículos roubados".

PONTEVEDRA, LÍDER. O informe establece tamén un ranking por municipios con máis de 75.000 habitantes, no que Galicia —aínda que non figura Ferrol por non chegar ao corte poboacional— volve saír ben parada. E neste caso, na comunidade dáse un fenómeno a destacar por rechamante: nas cidades, excepto A Coruña, hai menos probabilidades de quedar sen coche que noutras poboacións das súas provincias.

Pontevedra é a urbe galega con menos actividade dos ladróns de vehículos, cun 74,96% menos que a media estatal e só por detrás —novamente— de Santander, aínda que neste caso contando só a cidade (-84,46%), que destaca holgadamente como a máis segura de toda España.

Tras a urbe do Lérez sitúanse a olívica (-72,00%) e a das Burgas (-66,20%). Ourense é o exemplo de que a cidade mellora significativamente as estatísticas provinciais debido a que hai máis roubos en Verín, Xinzo e noutras zonas próximas á fronteira. En Santiago, pola súa banda, o risco é un 65,54% menor que no conxunto estatal e en Lugo, un 63,10%, o que tamén evidencia que hai máis perigo de sufrir esta tipoloxía delituosa en outros municipios da provincia que no da capital.

En cambio, na Coruña ocorre o contrario, e a cidade sitúase cun 50,99% menos de risco que a media do país. é a urbe galega menos segura da lista, pero si permite durmir con tranquilidade comparado con aparcar o coche nos barrios e cidades dormitorios de Madrid e Barcelona e do sur: Dos Hermanas (+102,52%), Santa Coloma de Gramanet (+91,99%) e Parla (89,95%) lideran esta pouco honrosa lista.