Ata 1.114 casos por violencia de xénero, sete deles con vítimas que son menores de idade, teñen seguimento policial activo na provincia de Pontevedra, segundo desvelou este mércores a subdelegada do Goberno, Maica Larriba.
Estas son os casos de risco que están rexistrados no sistema Viogen de seguimento integral da violencia de xénero ata a data de onte, 20 de outubro.
Preto da metade dos casos (500) danse entre mulleres de 31 a 45 anos, seguido das mulleres de 46 a 64 anos (298), mulleres de 18 a 30 anos (268) e maiores de 65 (40).
De todos eles, detallou Larriba, hai un caso de risco "extremo" para a vítima e noutros doce apréciase por parte das autoridades un risco "alto".
A subdelegada asegurou que se está producindo unha "tendencia á baixa" no número de denuncias presentadas por violencia machista, das 592 formuladas no primeiro trimestre de 2019 ás 521 que se rexistraron en 2020.
O descenso é "considerable", engadiu, no segundo trimestre ao coincidir co estado de alarma, ao pasar de 573 a 490 en comparación co mesmo período do ano pasado.
