O paro retrocede en Pontevedra. E faino ao abrigo da desescalada do mes pasado, en perigo polo auxe de contaxios de coronavirus asociados ao macrogromo de Mallorca. O último informe da Xunta, publicado onte, revela que a capital das Rías Baixas pechou xuño con 5.046 desempregados, a cifra máis baixa para un inicio de verán desde 2008, antes da gran crise inmobiliaria e financeira. Naquel momento, o número de parados situábase en 4.630.
A estatística tamén pon de manifesto que a cidade suma seis meses consecutivos con baixada de paro. Un total de 242 veciños abandonaron as listas do antigo Inem o mes pasado e a taxa reduciuse nun 18,3% respecto de xuño de 2020, cando se contabilizaban 6.176 desocupados.
A pesar de que a evolución é positiva, os sindicatos evitan a euforia. Entre outros motivos, porque os traballadores afectados polos Expedientes de Regulación Temporal de Emprego (ERTE) non contabilizan como parados.
O secretario de Organización de Comisións Obreiras, José Luís García Pedrosa, alerta de que a melloría do mercado de traballo é un espellismo para moitas persoas. Ademais de modificacións das condicións laborais, o sindicalista apunta que "aínda hai moitos traballadores en ERTE de redución de xornada aos que se lle fai traballar máis tempo do debido".
Aínda hai moitos traballadores en ERTE de redución de xornada aos que se lles fai traballar máis tempo do debido
"Os datos melloraron, pero os traballadores seguen en precario e a temporalidade é absoluta. Non hai políticas de emprego", sinala o secretario comarcal da CIG, Marcos Conde, que alude á estacionalidade dos empregos xerados no inicio da campaña de verán.
Os datos melloraron, pero os traballadores seguen en precario e a temporalidade é absoluta. Non hai políticas de emprego
Esta situación de eventualidade tamén é sinalada polo líder comarcal de UXT, Ramón Vidal Trillo, que advirte da "inestabilidade" do mercado laboral pontevedrés, que está "condicionado pola evolución da pandemia e do noso comportamento". "Estamos levando a cidade cara ao sector servizos, que demostrou unha gran debilidade neste tempo. Cómpre ir cara a industria e o I+D", destaca.
Estamos levando a cidade cara ao sector servizos, que demostrou unha gran debilidade. Cómpre industria e I+D
A lectura de Vidal Trillo susténtase en que o desemprego segue sendo superior no sector servizos. Un total de 3.715 parados de Pontevedra proceden de actividades terciarias, o que representa o 73,6% do cómputo global. A industria ocupa o segundo posto deste ranking, con 470 parados, seguido da construción (380) e a agricultura e a pesca (103).
Do informe de xuño extráese que todos os sectores económicos reduciron a taxa de desocupados na capital, que, con todo, viu crecer os parados de longa duración —aínda que de forma anecdótica—. Os pontevedreses que levan máis dun ano sen traballo pasaron de 375 a 378 no último mes.
O paro segue sendo maior entre as mulleres de Pontevedra. O desemprego feminino afecta a 3.011 veciñas do municipio, o 59,7% do total. Pola contra, o acceso dos homes ao mercado laboral presúmese máis fácil se se seguen as cifras, que indican que en xuño había 2.035 cidadáns sen traballo: o 40,3%.
O informe da Xunta dá outro dato preocupante: case tres de cada catro parados (1.470) da cidade teñen entre 50 e 59 anos. Con respecto ao nivel académico, atopar un traballo é máis difícil para quen só teñen estudos básicos (1.554 veciños).
A de camareiro álzase de novo como a profesión con máis demanda
A temporalidade segue sendo a materia pendente do mercado de traballo pontevedrés. Dos 2.899 contratos asinados o mes pasado, 2.067 tiñan data de caducidade, o que representa ao 89,9% do total. Destes últimos, 1.036 eran temporais a tempo parcial, é dicir, ‘ minijobs’: eventuais e de escasa remuneración.
O informe da Xunta revela que só 271 empregos xerados en xuño deste ano foron fixos. Deles, 190 tiñan a condición de indefinidos a tempo completo e 81 a tempo parcial. Ademais, as empresas empezaron a incorporar aos seus persoais a persoas con contratos de prácticas ou formación (doce en total). Os sete empregos restantes adscríbense a outros epígrafes laborais.
O tramo de idade con máis contratos foi o de 25 a 29 anos: 570 en total.
En xuño asináronse 2.899 contratos en Pontevedra, 538 máis que o pasado mes de maio.
