A Sala do Penal número 1 de Vigo inicia este mércores o xuízo contra cinco homes de entre 33 e 45 anos, un de Pontevedra e os outros catro da cidade olívica, todos eles sen antecedentes penais, acusados dun delito de tráfico de drogas e pertenza a grupo criminal. Para cada un deles a Fiscalía solicita cinco anos e medio de prisión e unha multa de 1,5 millóns de euros.
Os acusados, segundo o escrito da Fiscalía, formaban parte dun colectivo estruturado para transportar haxix que compraban en Huelva e outras localidades do sur de España e trasladaban a Galicia para vender a menor escala en Redondela, Vigo e arredores.
Os cinco acusados estaban baixo a lupa da Unidade de Drogas e Crime Organizado da Policía Nacional cando un deles foi sorprendido o 1 de febreiro de 2017 na localidade portuguesa de Monçao pola GNR lusa ao volante dunha furgoneta na que transportaba 90 bolsas con cen landras de resina de cannabis, o que equivale a máis de 88,5 quilos de haxix que no mercado alcanzarían un valor de case 506.000 euros.
Segundo a Fiscalía, un dos cinco acusados era o xefe da organización e encargábase de viaxar persoalmente ao sur de España para negociar a compra da droga; outro tiña un local en Redondela que puña a disposición da organización para reunións e súa era a responsabilidade de conseguir os vehículos que usaba a banda. Os tres restantes transportaban a droga, vixiaban á Policía durante o traxecto e distribuían o xénero unha vez en Galicia.
A actividade da organización quedou desarticulada en febreiro de 2017, xa que tras interceptar o vehículo cargado de droga a Policía levou a cabo rexistros nos domicilios dos compoñentes da organización.
Durante os mesmos, a Policía achou, entre outras cousas, diferentes cantidades de diñeiro en efectivo, cadernos con apuntamentos contables, máis dunha ducia de teléfonos móbiles e cartóns, diferentes permisos de conducir a nome da mesma persoa, un chaleco antibalas, unha defensa eléctrica, un detector de metais, turismos ou probas documentais de aluguer de coches.
Por todo iso, a Fiscalía pide para os acusados catro anos e medio de prisión para cada un por un delito contra a saúde pública, e outro ano por un delito de integración en grupo criminal.
