Os deputados provinciais do PP por Pontevedra anunciaron este mércores que solicitarán a celebración dun pleno extraordinario na Deputación para abordar a subida do peaxe na AP-9, que entrará en vigor o 1 de xaneiro e consideran "un agravio" para os galegos e os pontevedreses.
"O Ministerio de Fomento non nos trata como nos corresponde e a Deputación non pode mirar para outro lado. A señora Carmela Silva ten que deixar o photocall e porse a traballar polos municipios da contorna", dixo en rolda de prensa Carmen Amoedo
Xunto con Amoedo compareceron Alfonso Marnotes, portavoz do PP en Vigo, e Jorge Cubera, portavoz popular na Deputación, quen sinalou que rexeitan o regreso dos "territorios de primeira e de segunda" e que a subida da peaxe "afecta gravemente ao sur da provincia, á súa mobilidade, competitividade e retorno económico". Pola súa banda, Marnotes cargou contra "o silencio cómplice" que atribúe ao alcalde de Vigo, Abel Caballero.
A peaxe da AP-9 subirá o 1 de xaneiro sobre un 2,6% polo acordo alcanzado en 2011 coa concesionaria Audasa para que as obras de ampliación de Rande se paguen vía peaxe, e non vía impostos, que é o que reclaman os tres deputados provinciais.
"Teñen que mitigar o agravio permanente no que estamos na comunidade galega e neste caso na provincia de Pontevedra", engadiu Amoedo, que volveu reclamar a supresión da peaxe en Redondela, que consideran a máis inxusta de toda Galicia.
