O PP solicitou este martes a dimisión de Miguel Anxo Fernández Lores por "mentir" sobre a situación da súa vivenda de Marcón. "Non pode continuar no cargo nin un minuto máis", asegurou o portavoz popular, Rafa Domínguez, que considera que o rexedor do BNG debe deixar as súas funcións "inmediatamente" tras a polémica ao redor da súa casa, que estivo sen licenza de primeira ocupación durante 22 anos.
O xefe da oposición sostén que desde que, transcendeu esta información, os concelleiros nacionalistas deron múltiples versións do acontecido. A pesar de que hai case dúas semanas descartaba pedir responsabilidades a Lores por esta polémica, Domínguez cambia agora de postura. E faino en base a un novo documento que ratifica que a casa do alcalde tiña que contar con este permiso, unha postura que desde o PP levan defendendo desde o inicio desta polémica. "A análise da nova documentación cámbiao todo", xustificou.
A documentación en cuestión é o
O edil do BNG defendeu que "nunca se mentiu" sobre a situación da casa do alcalde
O trámite de primeira ocupación iniciouse o verán pasado ao decatarse de que carecía del tras solicitar unha reforma na súa casa, concretamente a construción dunha piscina. O documento en cuestión, que en Pontevedra non se solicita a vivendas unifamiliares por falta de medios, foi aprobado polo Concello en xaneiro deste ano. Domínguez, que primeiro asegurou que a vivenda era "ilegal" e que agora emprega a palabra "irregular" para referirse a este caso, insiste en que "un erro é aceptable". "Isto, cunha desculpa do señor Lores quedaría para charangas ou chirigotas, pero a mentira continuada e reiterada do BNG e do señor Lores é inadmisible. É a peor xestión dunha crise que vin en moito tempo", dixo Domínguez
A réplica ao líder da oposición deuna Cesáreo Mosquera, titular de Infraestruturas. O edil do BNG subliñou que "a casa do alcalde é perfectamente legal e nunca tivo ningunha ilegalidade" e recordou que os servizos técnicos do Concello non esixían entón nin agora a licenza de primeira ocupación, que só se require cando as edificacións afectan a terceiros, hai cambios técnicos ou solicitudes de reforma. Tamén asegurou que "a xente que ten vivendas na mesma situación que queden tranquilas porque o Concello non vai facer ningunha medida máis do que se lle esixiu ao alcalde".
Mosquera, que evitou valorar as explicacións públicas dadas polos seus compañeiros de partido sobre esta polémica, afirmou que Domínguez tamén entrou a vivir na súa nova casa antes de obter o citado permiso de ocupación. "En abril de 2020 colgou nas redes sociais que pasou o confinamento na súa nova vivenda cando non tiña licenza de primeira ocupación", sinalou o concelleiro nacionalista, que criticou que o xefe da oposición utilice este asunto para atacar a Lores cando el fixo o mesmo.
O edil do BNG defendeu que "nunca se mentiu" sobre a situación da casa do alcalde. "Díxose que o Concello non a pedía (a licenza de primeira ocupación)", dixo tras referirse a este documento, que é o que certifica o final de obra, como "un trámite de protección do comprador".
