Nova promesa electoral do PP. O candidato popular á Alcaldía de Pontevedra, Rafa Domínguez, presentou este martes a súa aposta por un novo modelo de lixos no municipio "máis ecolóxico e máis sostible": un servizo de recollida porta a porta.
O plan aplicaríase na cidade e obrigaría a que as comunidades de veciños tivesen ata catro colectores, que poderían sacar á rúa de 20.30 a 23.00 horas para a súa recollida. Os envases, os plásticos, o papel e o vidro enviaríanse a centros de reciclaxe e os restos de comida remitiríanse á planta que Sogama ten en Cerceda para a súa incineración, un modelo que a Unión Europea insta a eliminar de forma progresiva.
A iniciativa electoral, que a popular Silvia Junco deseñou inspirándose no modelo de Oviedo, contemplaría un abaratamento do recibo de ata o 25% "por comunidades". A medida iría acompañada coa retirada dos colectores de rúas como Benito Corbal, fronte a vivendas e comercios, por razóns de estética. "Eu avogo por unha Pontevedra sen colectores, limpa", recalcou.
O sistema levaría tamén a supresión dos composteiros comunitarios dos barrios, aínda que o plan de reciclaxe dos restos de comida manteríase no rural. Para as parroquias, Domínguez tamén promete aumentar as frecuencias da recollida de lixo.
E canto custaría o servizo? O alcaldable do PP asegura que non faría falta máis medios nin persoais nin materiais. O custo actual do contrato do lixo ascende a 5,9 millóns de euros cun persoal formado por 125 persoas.
Tamén sinala que o novo servizo podería implantarse, de forma progresiva, despois das eleccións municipais de maio. A concesión de Ferrovial Servizos (a antiga Cespa) ten vigor ata o 9 de xuño de 2021.
O PP aproveitou a presentación do seu novo modelo de lixos para arremeter contra a xestión do Goberno local e o seu proxecto estrela, o compost, que avanza a pasos moi tímidos. Domínguez acusou ao BNG de gastar "1,5 millóns de euros" neste plan. "É un malgasto", indicou.
