O PP incorporou este venres unha nova denuncia ás súas queixas polos "problemas de tráfico" en Pontevedra. O seu portavoz, Rafa Domínguez, criticou a falta de conexión dos parkings disuasorios co centro da cidade tras un encontro co colectivo Pedaladas, no que reclamou un carril-bici polo aumento de persoas que utilizan este medio de transporte.
O xefe do principal partido da oposición considera que a inexistencia de itinerarios ciclistas pola cidade, a falta dun "bo transporte público propio dunha capital de provincia" ou a carencia dunha conexión entre os estacionamentos e o centro, situados a menos de 20 minutos a pé da zona vella, "terminan repercutindo nos problemas de mobilidade que estamos a afrontar en Pontevedra".
"A forma na que se moven e desprazan os cidadáns foi cambiando. E aquí temos unha ordenanza desfasada, de 1989. O único que temos son cortes de rúas e caravanas", sinalou.
