A Praza de España converterase no novo quilómetro cero das rutas turísticas por Pontevedra. O Concello instalará a semana que vén un monólito de catro metros de altura fronte ás Ruínas de San Domingos que marcará o inicio de itinerarios polo centro histórico e por zonas verdes da capital provincial. Nel haberá un código QR que veciños e turistas poderán descargar para coñecer a pé distintos enclaves da cidade.
A iniciativa presentouna onte a concelleira de Turismo, Yoya Blanco, que estivo acompañada polos seus compañeiros de grupo, os socialistas Iván Puentes (Medio Natural) e Tino Fernández (Deporte).
As rutas por espazos naturais levan o nome de Pontevedra Verde. Todas elas parten da Praza de España e direccionan cara a zonas como a Alameda, As Palmeiras, A Moureira, A Xunqueira de Alba, A Illa das Esculturas, Os Gafos, a zona vella, a ría, Lérez, Pazo de Lourizán, O Pontillón do Castro, Santa María de Xeve, As Mouras (Salcedo) ou o monte da Fracha. Nestes itinerarios tamén se ten moi en conta o Camiño Portugués a Santiago ou os roteiros Castelao.
"TESOUROS". Branco asegurou que "moitos destes tesouros existentes no contorno da nosa cidade forman precisamente parte desta guía". Nos seus 16 páxinas pode accederse a unha completa información de áreas como os dous Espazos Naturais de Interese Local (Enil) que ten Pontevedra: o da Xunqueira de Alba e o dos Gafos. O Concello confía en que esta iniciativa sirva como un recurso máis para os turistas.
