O prezo da ameixa mantense e dá un respiro ao sector marisqueiro

Os bos prezos da ameixa dan un respiro ao sector marisqueiro. Unha situación que provocou que a Xunta dese luz verde á petición dos mariscadores para ampliar en dúas xornadas máis, o xoves e o venres, o límite de días para mariscar durante o mes de novembro, que se situaba en 11.

O prezo estabilízase ante unha demanda pouco habitual durante este mes, antesala da época máis forte do sector, o Nadal, que este ano se espera con incerteza. Na xornada do xoves recolléronse ao redor de 3.500 quilos de ameixa xapónica, explica o patrón maior da Confraría de San Telmo, César Rodríguez.

En cotas de 10 quilos e cun prezo que oscilou entre os 9,13 e os 10,50 euros dependendo do tamaño que, nesta ocasión, foi máis pequeno por ter que ser recollida nunha zona alta, un factor que non afectou con todo ao prezo do produto. As cifras son similares ás obtidas a semana pasada e dan un respiro ao sector durante estas semanas de inquietude ante o peche da hostalería e unha campaña do Nadal que ninguén é capaz de prever.

"Vivimos ao día", explica a patroa maior da Confraría de Lourizán, Maricarmen Vázquez, e é que o peche da canle Horeca, o principal comprador, tamén lles pillou por sorpresa. As grandes superficies foron as maiores demandantes do produto nas últimas semanas, nun mes considerado bastante baixo en anos normais. Con todo, nesta ocasión, a demanda aumentou, polo que estas dúas xornadas extra solicitadas resultaron positivas para o sector.

A incerteza que se vive obriga a "barallar" as súas posibilidades e previr, explica Vázquez, que insiste na necesidade de aproveitar "o que se poida" mentres as circunstancias cambian cada día. Unha opinión que tamén comparte Rodríguez, "mentres podamos ir avanzando, mellor". O sábado sairán de novo a mariscar a pé nun día normalmente frouxo, pero que dada a actual demanda espérase manteña os prezos.