Prisión para os detidos que roubaban ás vítimas tras darlles sustancias químicas

Dúas denuncias foron presentadas en Pontevedra

Material incautado en la operación. DP
photo_camera Material incautado na operación. DP

Os dous detidos por catro roubos con intimidación en Galicia para os que usaban sustancias químicas para someter ás súas vítimas foron enviados a prisión tras pasar a disposición xudicial, informou a Policía Nacional. Axentes da Policía Nacional detiveron aos dous individuos como presuntos autores de ata catro roubos con intimidación mediante submisión química, pola que usaban sustancias para someter ás súas vítimas. Foron presentadas dúas denuncias en Pontevedra, unha en Santiago de Compostela e outra en Vigo.

Segundo relatou a Policía Nacional, os presuntos autores de orixe colombiana e española, ambos de 42 anos, fornecían ás súas vítimas sustancias como a benzodiacepina para que non puidesen presentar resistencia aos seus agresores. O modus operandi sempre era o mesmo, indicou a Policía, xa que "establecían contactos coas súas vítimas a través de coñecidas aplicacións de contactos onde un deles, o de orixe colombiana, mantiña un perfil activo e unha vez se gañaban a súa confianza concertaban unha cita".

Unha vez acordaban o encontro quedaban nalgún bar da cidade e alí, nunha das consumicións, "fornecíanlle a sustancia tóxica neste caso concreto, benzodiacepina", engade a Policía.

Unha vez que a vítima se atopaba submisa debido ás sustancias químicas, "entraba en xogo o outro detido que se atopaba nas proximidades do bar e que, cando o primeiro o chamaba, dirixíase ao lugar para axudarlle a subir á vítima ao domicilio", indican as mesmas fontes policiais. Unha vez alí perpetraban os roubos.

XOIAS. Unha vez no interior dos domicilios, e coa vítima "totalmente sometida", os dous detidos dedicábanse a subtraer todos os efectos de valor e xoias que había nas vivendas. Nalgún dos casos recuperáronse cartóns bancarios subtraídas coas que fixeran retiradas en efectivo en caixeiros e diferentes cargos en conta, asegura a Policía.

Os axentes policiais levaron a cabo unha entrada e rexistro no domicilio dos detidos que vivían xuntos, onde se recuperaron múltiples xoias subtraídas e diferentes obxectos electrónicos.

LESIÓNS. Así mesmo, aos detidos impútaselles un delito de lesións dado que unha das vítimas presentaba costelas rotas e outra apareceu ao día seguinte semiinconsciente ás portas do ascensor do seu edificio. Ademais, unha das vítimas era coidador dunha persoa maior que, ao non ser atendida debidamente por el dado que se atopaba inconsciente, o ancián caeu da cama e rompeu o fémur.

A Policía concretou que ao detido de Colombia incoóuselle o correspondente expediente de expulsión por atopase en situación irregular en España. A investigación foi levada a cabo por axentes da Brigada Provincial de Policía Xudicial, Brigada de Seguridade Cidadá e Brigada de Policía Científica de Pontevedra, Vigo e Santiago de Compostela.