O PSOE provincial deu este venres por iniciada a súa carreira cara ás municipais do 26 de maio de 2019 afirmando que contará con candidaturas no 100% dos concellos. Así o sinalou o secretario xeral dos socialistas pontevedreses, David Regades, que presidiu a reunión da Comisión Executiva provincial na sede da capital do Lérez, unha xunta na que, entre outros asuntos, deuse conta do calendario para os próximos comicios.
"Nestes momentos comeza de forma definitiva para o partido socialista a campaña para as municipais na provincia de Pontevedra", dixo Regades, quen precisou que nas municipais de 2015 o PSOE conseguira presentar 59 candidaturas na provincia cubrindo o 95% do territorio, un índice maior que o do conxunto do Estado, pois en toda España o partido presentou 7.210 listas no 88,73% dos concellos. "Imos facer un esforzo e agora imos obter en 2019 candidaturas no 100% dos 61 concellos da provincia", dixo o socialista.
Como primeiro paso, o PSOE empezará este mes unha serie de reunións en todas as comarcas. "Reunirémonos en dúas ou tres comarcas cada semana, xuntándonos cos secretarios xerais e cos posibles candidatos para ir fraguando as candidaturas e, a partir deste mes, imos empezar a presentalas", sinalou. "Temos un obxectivo moi optimista e claro: ser a primeira forza na provincia e mellorar o resultado na Deputación, volvendo gobernala aínda con máis maioría da que tivemos neste mandato", sentenciou. "Imos manter todos os alcaldes e recuperar as alcaldías que de forma fraudulenta, a través de mocisóns de censura, levou ou PP".
David Regades aproveitou para arremeter contra os líderes "populares" na provincia e en Galicia. De Alfonso Rueda dixo que "está máis preocupado dás liortas internas que das necesidades que teñen cidadáns" e, do presidente autonómico, Alberto Núñez Feijóo, sinalou que "o único que ten pendente é fixar o día da cea de recoñecemento polo seu traballo á fronte da Xunta e que lle dean unha placa, porque a súa retirada é inminente. Xa non ten a cabeza nin a vocación postas en Galicia", afirmou.
Por outra banda, a Comisión Executiva provincial tamén informou este venres da próxima celebración da "Festa da Rosa" na provincia, que terá lugar o día 30 deste mes no Porriño. Os socialistas compartirán unha comida á que asistirán alcaldes e responsables do partido a nivel local, provincial, autonómico e estatal.
