O secretario xeral do Partido Socialista de Galicia, Gonzalo Caballero, destacou que neste día "o PSOE cumpre o seu compromiso cunha demanda exposta durante décadas pola sociedade civil" para que o Val dos Caídos deixe de ser un mausoleo no que "honrar ao ditador, mentres segue habendo miles de desaparecidos".
Con motivo da exhumación do ditador Francisco Franco, o Partido Socialista da provincia de Pontevedra organizou na cidade do Lérez unha homenaxe ás vítimas do franquismo na Rúa 12 de Novembro, xunto ao monumento aos fusilados aquel día do ano 1936.
Neste acto, no que participaron familiares das vítimas, realizouse unha ofrenda floral aos pés do monólito no que están gravados os nomes dos dez pontevedreses asasinados aquela xornada: Amancio Caamaño, Telmo Bernárdez, Luís Poza, Paulo Novás, Germán Adrio, Benigno Rei, José Adrio, Víctor Casas, Juan Rico e Ramiro Paz.
O secretario xeral do PSOE na provincia de Pontevedra, David Regades, referiuse ao traslado do corpo de Franco do Val dos Caídos ao sinalar que con este xesto "España acaba coa vergoña de ter un monumento para enxalzar a un ditador".
Regades condenou o réxime do 36 e defendeu as liberdades e a memoria dos represaliados para sinalar que "o socialismo tiña unha ferida aberta que hoxe empeza a pechar".
Para a responsable de memoria histórica do PSOE na provincia, María Fernández, a exhumación dos restos de Franco é "un acto de dignidade e de xustiza para as vítimas e a democracia", e condenou que no Val dos Caídos existise "un mausoleo para os gañadores e unha fosa para os perdedores".
Pola súa banda, a subdelegada do goberno en Pontevedra e secretaria xeral da agrupación municipal do PSOE, Maica Larriba, indicou que o día de hoxe será recordado como "un triunfo para os demócratas e un recoñecemento á dignidade dos que loitaron pola democracia".
