A oitava edición de Si Quero clausurouse este domingo no Recinto Feiral de Pontevedra cun novo éxito de público e de actividade. Segundo explicou a organización, foron centenares de persoas as que ao longo de todo a fin de semana acudiron a este salón de vodas e grandes celebracións no que colaborou a Concellería de Promoción Económica dirixida por Yoya Blanco. De feito, á vista dos resultados obtidos, os responsables do evento xa están a pensar na que será a edición número nove.
Nesta ocasión, algúns dos momentos estelares volveron ser os desfiles de moda nupcial, de festa e de Comuñón nos que se exhibiron modelos de Mady Noivas, Modas Olga e Trasniños.
Os deseños espertaron os aplausos do numeroso público que se reuniu ao redor da pasarela instalada no Recinto, sobre todo en horario de tarde. De feito, os pais que teñen no horizonte a Primeira Comuñón das súas fillas ou fillos puideron tomar boa nota de cales son as tendencias en traxes e vestidos, do mesmo xeito que fixeron moitas parellas que están a organizar a súa voda. Os vestidos de noiva foron protagonistas xunto cos de noivo e festa, porque Si Quero non só volveu a ofrecer múltiples alternativas para os futuros contraentes, senón tamén para os padriños e madriñas e para o resto de invitados a algún enlace ou gran celebración.
[Desfile de noivos. GONZALO GARCÍA]
Así mesmo, os peiteados acapararon todas as miradas grazas ao magnífico traballo de barbería realizado polos e as profesionais de Carlos Angueira Hairdresser, que se encargou de preparar ás e os modelos.
Ademais dos maiores, os máis pequenos causaron sensación lucindo traxes de Comuñón e de arras e fixeron saltar os flashes de moitas cámaras de fotos.
[Desfile de Comuñón. JAVIER CERVERA]
Os máis de trinta expositores participantes nesta edición de Si Quero tamén rexistraron unha intensa actividade, sobre todo informando e asesorando a persoas que están a organizar a súa voda ou algunha outra celebración.
Para iso o salón celebrado desde o pasado venres no Recinto Feiral reuniu casetas de wedding planners, restauración e catering, xoiería, invitacións e deseño gráfico, listas de voda, axencias de viaxes, hoteis, florerías, barberías, profesionais da fotografía, música e animación, vehículos, agasallos, organizadores de eventos e incluso firmas que ofrecen experiencias orixinais e extremas pensadas especialmente para as parellas de noivos.
