A área sanitaria de Pontevedra e O Salnés reactivou asistencialmente a Unidade de Reanimación do Hospital Montecelo, tras concluír a execución do proxecto arquitectónico de mellora desta área.
Segundo informou a Xunta, esta iniciativa, que se desenvolveu ao longo das últimas dúas semanas, "potencia os niveis de confort e illamento dos pacientes que presentan necesidades de vixilancia continuada, optimizando a operatividade dos anteriores espazos".
Así, os traballos permitiron incrementar o número de boxes de illamento –pasando dun a catro–, así como pintar toda a área, renovar a súa iluminación con tecnoloxía led, limpar os condutos e reforzar o cableado nas dependencias.
Durante este período, os enfermos que requiriron tratamento deste tipo emprazáronse nas Unidades de Espertar postanestésica e de Cirurxía Maior Ambulatoria, dependencias que esta área sanitaria readaptou e reforzou para atender pacientes críticos durante a pandemia pola Covid-19.
A porcentaxe de reactivación da actividade cirúrxica no CHUP tras o pico pandémico é nestes momentos dun 70%.