O recibo da luz supón xa, en media, ao redor do 27% do total dos gastos de produción que teñen que afrontar os autónomos con establecementos que necesitan electricidade para poder desenvolver a súa actividade. Con este panorama, a diminución nas súas marxes de beneficios estímase en case o 10% sobre o prezo final dos produtos ou servizos que ofrecen ao consumidor.
Así o denunciou este venres a Unión de Profesionais e Traballadores Autónomos (UPTA), cuxos cálculos indican que, coas facturas eléctricas actuais, os pequenos negocios teñen que dedicar máis de 80 minutos de produción cada día soamente para poder facer fronte aos custos enerxéticos.
"Un pequeno establecemento que teña contratados entre 10 e 15 KW/hora, en setembro de 2020 a factura total que tivo que asumir foi de aproximadamente 650 euros. Coas subidas de prezos actuais, a factura correspondente a este será duns 1.300, máis do dobre que o ano anterior", precisou a entidade que preside Eduardo Abad.
E é que a escalada do prezo da luz en España continúa imparable. Este mesmo xoves pulverizouse outra marca por segundo día consecutivo no mercado almacenista, ata
Ademais de ocupar titulares de prensa, estas cifras están a pór a moitos autónomos contra as cordas, sobre todo porque na maior parte dos casos resúltalles imposible sacar partido da tarificación por franxas horarias.
"Eu agora estou a pagar polo menos un 30% máis de luz que antes. Niso vánlleme cada dous meses uns 600 euros, unha auténtica barbaridade", explicaba este venres Macario Fariña, responsable de carnicerías Macario con posto fixo na Praza de Abastos de Pontevedra.
"Para funcionar necesito neveiras, conxelador, expositores, cheminea para os chourizos... Son aparellos dos que non podo prescindir e moitos teñen que estar conectados as 24 horas. Non me vale iso que din de aproveitar as horas nocturnas porque a luz sae máis barata. Quen traballamos con produtos frescos como carne, peixe, froita ou verduras, necesitamos si ou si neveiras e aparellos que consomen moita electricidade, sobre todo no verán, cando os consumos se triplican. Para nós non ten ningún sentido iso de aproveitar as franxas horarias máis económicas e quen diga o contrario demostra un descoñecemento total de como funcionan a maioría dos negocios".
Fariña é fillo e neto de carniceiros e, segundo relata, "os meus pais e avós non tiveron estes problemas cos recibos da luz. Se tiñan que comprar unha neveira ou un conxelador facíano. Só tíñanse que preocupar de se podían pagar o electrodoméstico, non do que ía suporlles o seu consumo eléctrico. Agora é ao revés".
"Pago un 30% máis". Do mesmo xeito que os establecementos dedicados á venda de produtos frescos, son moitísimos os negocios nos que a enerxía supón un dos principais gastos fixos: barberías, talleres, cafeterías e restaurantes, tendas de conxelados e un longo etcétera.
As lavanderías autoservicio son outro exemplo, tal e como explica Carmela, responsable da lavandería FabyMar na avenida Porteliña (Poio). "Eu de electricidade pago entre un 25 e un 30% máis que antes. As lavadoras necesitan corrente para funcionar e fano só en horario diúrno, porque loxicamente os clientes non van vir a lavar a súa roupa de madrugada, que é cando a luz é máis barata". Ademais, recorda que Poio é un dos moitos municipios aos que aínda non chegou o gas cidade, así que os seus habitantes teñen que depender aínda máis da electricidade.
Segundo a Unión de Profesionais e Traballadores Autónomos, son os propietarios dos negocios quen están a sufrir as consecuencias do aumento dos recibos, porque non poden permitirse subir os prezos dos seus produtos e servizos para tratar de cubrir ese sobrecusto, "xa que na actual situación económica, aínda están a recuperar aos poucos a normalidade e por suposto a clientela non está en condicións de asumir unha subida de prezos", indicou o colectivo.
