Os Reis Magos chegan este sábado a Pontevedra. Os personaxes inspirados nas figuras duns magos de Oriente que lle levaron agasallos ao neno Xesús acabado de nacer, segundo a tradición cristiá, percorrerán este sábado as rúas das vilas da provincia para ledicia da gran maioría dos nenos, que agardan que lles traian regalos. Farano, en case todos os casos, como protagonistas de cabalgatas organizadas polos diferentes concellos.
A Cabalgata da capital da provincia sairá ás 18.00 horas de José Malvar e pasará por Benito Corbal, A Peregrina e Michelena
Na capital da provincia, o desfile, no que participarán 300 persoas e que inclúe seis carrozas, sairá ás 18.00 horas da rúa José Malvar e rematará, unha hora e media máis tarde, na Alameda. Percorrerá Loureiro Crespo, Benito Corbal, A Peregrina e Michelena. Iso será pola tarde, pero os Reis Magos xa estiveron pola mañá na cidade. Arredor das 10.45 sairon do Concello para dirixirse a pé ata a Praza da Pedreira. Alí, no Pazo de Mugartegui foron saudados polas autoridades locais, co alcalde á cabeza. Dende as 11.00 recibiron a todos os cativos que desexen achegárselle e repartiron caramelos.
Esa é a axenda oficial de Melchor, Gaspar e Baltasar, que, fóra dela, visitarán numerosos centros, asociacións e colectivos.
NOS HOSPITAIS. Os Reis Magos do Complexo Hospitalario de Pontevedra (CHOP) xa se deixaron ver este venres na cidade, cando foron recoller os bonecos realizados con gancho, ao longo de todo o ano, por clientas voluntarias da tenda Pepa y Punto. As súas Maxestades de Oriente repártenos entre os cativos que pasan estes días ingresados no Hospital Provincial. Ademais, este sábado pola tarde visitarán o Hospital de Montecelo para entregar caramelos e obsequios aos nenos.
Os Reis do CHOP recolleron este venres os bonecos que reparten no Hospital Provincial e este sábado á tarde estarán tamén en Montecelo
Pero os do CHOP non foron os únicos Reis Magos que se deixaron ver xa onte pola cidade. No barrio de Monte Porreiro celebraron a súa propia Cabalgata. Primeiro visitaron o centro cultural nun acto no que estaba previsto que actuara Barafunda. Despois realizaron o tradicional percorrido, con saída da rúa Italia, preto do Mirador, para pasar pola rúa Alemaña e volver ao centro cultural unha hora despois.
CANTOS. A véspera da chegada das súas Maxestades de Oriente, como é tradicional dende hai anos en Pontevedra, un coro de nenos, que ensaian coa agrupación Os Chichisos, saíu a cantar os Reis polo centro da cidade.
"En Nadal cantábanse panxoliñas ou nadais, en fin de ano as xaneiras, manueis ou aninovos, e a véspera de Reis os cantares de Reis ou aguinaldos", explican Os Chichisos. "Os cantos de Reis eran interpretados por cuadrillas ou xugadas de homes, mozos e nenos que percorrían as casas dando a boa nova cantando". Existen rexistros destes cantos, hoxe case desaparecidos, dende 1920. "Forman parte do noso patrimonio. Son un tesouro".
