Os entroidos de Samede (A Coruña), Esgos (Ourense) e Teo (A Coruña) protagonizarán as VIII Xornadas sobre o Entroido de Galicia, que se celebran en Pontevedra os días 28 e 29 de febreiro. O programa da actividade, que organiza a Sociedade Antropolóxica Galega (Saga) e se desenvolverá no espazo Nemonon, inclúe seis relatorios e unha exposición de fotos.
O presidente da Saga, Rafael Quintía, e o concelleiro de Memoria, Xaquín Moreda, presentaron esta proposta, que se inaugurará o venres (18.10 horas) coa presentación do libro Historia e recuperación do Entroido de Samede, por parte de Emi Cagiao. A continuación (18.30), representantes da Asociación Felos e Madamas de Esgos falarán do seu Entroido e Julio I. González impartirá unha conferencia co título O mundo do revés. O tero de Entroido en Galicia (19.15). A xornada rematará cun coloquio no que participarán os diferentes relatores.
O sábado, Carlos X. Ares presentará o libro Festividades de inverno na provincia de Ourense e haberá unha actuación do grupo Escaravellos (18.10). A seguir (18.30), Lidia Mariño falará de A figura da vella no Entroido. Finalmente (19.15 horas), Chema Cebeiro (A Regionalista de Teo) analizará A Danza de Entroido na Ulla. Todas as actividades son de entrada libre e gratuíta.
