De loito e en procesión tras un coche fúnebre. Con lápidas, sogas ao pescozo e campás tocando a morto. Máis dun centenar de hostaleiros da comarca percorreron este mércores as rúas de Pontevedra para representar unha vez máis a trágica situación que atravesa o sector a consecuencia da pandemia e as medidas de restrición.
Empresarios da hostalería e o turismo, así como provedores protagonizaron unha manifestación polas rúas da Boa Vila na que lamentaron que a reapertura parcial prevista para o "venres non supón a solución" a un sector que arrastra "once meses acumulando débedas".
"Levo 40 anos dedicándome a isto, xa non podo empezar de cero"
De rigoroso loito e "moi saturada" percorreu as rúas de Pontevedra María del Carmen, unha hostaleira de Sanxenxo, propietaria dun asador e de apartamentos turísticos para reclamar ás administracións o rescate da hostalería. "Estamos moi cansados
Considera esta empresaria que as administracións non actúan de forma xusta ao sinalar á hostalería como foco da pandemia. "Avergóñame que nos boten a culpa e realmente hai un mes foi cando máis casos había e a hostalería estaba pechada".
"Levo 40 anos traballando neste sector, teño 54. ¿Quen me vai a contratar agora? Non podo empezar de cero", concluíu.
"A situación é límite, sen un rescate real a hostalería vaise"
"A situación é totalmente límite, sen un rescate real a hostalería do país vaise", así de contundente mostrouse o novo presidente de Hoempo.
O representante dos hostaleiros de Pontevedra, Marín e Poio encabezou a manifestación da Boa Vila cunha das pancartas e destacou a necesidade de que as adminsitracións leven a cabo "un rescate real, é dicir, indemnizacións que acheguen aparte para non dar perdas todos os meses". "Temos moitos gastos cos nosos locais pechados, xa non temos de onde tirar, xa non hai máis créditos. A situación é completamente límite".
Daniel Lorenzo confía en que Pontevedra poida reabrir pronto en interior aínda que por agora os aforamentos sexan reducidos "porque a cidadanía estase comportando moi ben e seguramente abriremos tamén en interior, pero aínda así, abrir con redución de aforamento do 50% ou do 30% non é suficiente. Sen un rescate a hostalería vai morrer".