A coincidencia da celebración do Tríatlon Cidade de Pontevedra e o primeiro partido de fútbol da tempada 2019-20, entre o Pontevedra e o Coruxo, provocará restricións de tráfico na zona norte da cidade o sábado.
A Policía Local anuncia que o venres comezan as primeiras limitacións co peche ao tráfico da ponte dos Tirantes desde as 17.00 horas ata as 23.30 do sábado, cando está prevista a finalización do tríatlon e a recollida da loxística.
Desde as 7.00 horas do sábado Rafael Areses e Alexandre Bóveda estarán pechadas ao tráfico, mentres que a partir das 14.15 pecharase todo o circuíto: avenida de Compostela (saída cidade), Celso Emilio Ferreiro e campus universitario.
A previsión de final das probas e apertura ao tráfico das citadas rúas será ás 20.40 horas, excepto a ponte dos Tirantes (23.30 horas).
A apertura ao tráfico das rúas será ás 20.40 horas
A partir das 22.00 horas do venres estará prohibido o estacionamento en Alexandre Bóveda, Celso Emilio Ferreiro, campus universitario e avenida de Compostela. Desde as 18.30 horas estará cortado ao tráfico o acceso ao Estadio de Pasarón por Leonardo Enríquez (avenida de Compostela), de tal xeito que os residentes na avenida da Coruña, Xoán Bautista Andrade, Médico Ballina e Lérez (entre as 18.30 horas e as 20.40) deberán facelo pola ponte de Monte Porreiro ou o cruzamento de Alba.
