"Este agosto as Rías Baixas volveron demostrar que son un referente turístico cuns resultados de marca". Así resumiu este martes a presidenta da Deputación, Carmela Silva, o balance do mes pasado, un período no que os establecementos da provincia alcanzaron unha media de ocupación do 87%, de acordo cos datos facilitados pola mesma institución.
Aínda que foi un catro por cento menos que en agosto de 2017, os concellos pontevedreses conseguiron manter o listón moito mellor que outros destinos de España, onde a freada na chegada de visitantes notouse moito máis.
Por comarcas, O Salnés conseguiu unha media do 91% de ocupación, Pontevedra obtivo un 90%, O Morrazo logrou un 92,7%, Caldas puido presumir de liderar o ranking cun 93% de media, a área de Vigo superou o 90%, O Baixo Miño obtivo un 84,4%, O Condado-A Paradanta rexistrou un 76,5% e Deza, Tabeirós e Terra de Montes tamén excederon o 76%.
En canto a tipos de aloxamento, os establecementos de turismo rural bateron o 82% e as vivendas de uso turístico continuaron co seu ritmo vertigonoso tras alcanzar en agosto o 92% de ocupación media, aínda que en municipios como Sanxenxo, Pontevedra, Vigo, Cambados e Silleda chegaron a colgar os carteis de completo. Tamén os cámpings viviron un bo agosto, cun 85% das súas prazas cubertas na provincia.
DE MADRID E BARCELONA. De todas as persoas que elixiron as Rías Baixas en agosto, o 81,63% foron españois (principalmente procedentes de Madrid, Barcelona, Valencia, Bilbao, Sevilla e Vitoria) e o 18,37% chegaron desde o estranxeiro. Neste caso, a maioría dos visitantes foron portugueses, aínda que tamén destacaron os italianos, ingleses, alemáns e arxentinos.
Mentres que os visitantes nacionais baixaron, o número de estranxeiros aumentou; os portugueses encabezan o ranking
Máis da metade dos turistas, concretamente o 56%, non estivera nunca antes neste territorio e, aínda que o sol e a praia foron dúas dos motivos principais para decidirse por esta zona, un 35% dos visitantes indicaron elixir Pontevedra pola cultura e máis dun 30% sinalaron o lecer como unha das súas motivacións para viaxar ata aquí.
Precisamente, Carmela Silva destacou os bos datos do Castelo de Soutomaior, que só en agosto recibiu 6.278 visitas, un 26,4% máis que no mesmo mes do ano pasado. Desde que reabriu as súas portas como castelo musealizado en maio, superou xa os 19.000 visitantes, un espectacular 104,3% máis que no mesmo período de 2017.
O Camiño de Santiago tamén exerceu un tirón moi importante para atraer viaxeiros á provincia. De feito, en agosto foron 15.576 os peregrinos que chegaron a Compostela a través dalgunha das rutas que atravesan o territorio pontevedrés, o que supón un 5% máis que nos mesmos días de 2017. De entre todos os itinerarios que transcorren polas Rías Baixas, o preferido continúa sendo o Portugués, que rexistrou 11.657 camiñantes, pero o que máis creceu foi o Portugués pola Costa (con 2.290 persoas, é dicir, un 45,7% máis), mentres que a Vía dá Prata foi percorrida por 1.568 peregrinos (un 6,5% máis que en agosto do 17).
DESDE XANEIRO. Os datos do mes pasado veñen consolidar un bo ano para o sector turístico, aínda que o crecemento non sexa tan pronunciado como o de 2017 debido, entre outros factores, á recuperación de destinos que supoñen unha competencia para España, entre eles Tunisia ou Exipto.
Entre xaneiro e xullo chegaron a Pontevedra 742.392 visitantes, soamente un 1,5% menos que no mesmo semestre do exercicio anterior, de acordo co INE, mentres que noutras provincias a caída foi bastante máis drástica. De feito, aínda que nas Rías Baixas o número de turistas nacionais experimentou un descenso do 4,7%, a cifra de estranxeiros aumentou un 11,5%, segundo destacou Carmela Silva.
A captación de viaxeiros internacionais é, precisamente, un dos obxectivos marcados no Plan Extratéxico de Turismo promovido pola Deputación.
