A celebración do tradicional día das Tres Grazas múdase este venres á igrexa parroquial de San Bartolomé co obxectivo de evitar as aglomeracións que se rexistran na ermida do Nazareno, á que centos de crentes acoden cada primeiro venres de marzo a cumprir co rito de pedir os favores divinos.
Así, as colas que viñan formándose ante a capela situada na Rúa Tetuán na festividade do Nazareno trasládanse ao templo de San Bartolomé pero, nestes tempos de pandemia, adaptándose á normativa sanitaria para a prevención dos contagios por covid-19: as persoas devotas deberán gardar a distancia de seguridade e usar o xel hidroalcólico á entrada do templo. En ningún momento poderase superar o aforamento máximo permitido na igrexa, que é de 80 persoas.
MISAS. Oficiaranse misas ás 9.30, 11.00 e 18.30 horas. En canto o aforamento máximo estea completo non se admitirá a entrada de máis fieis. Ademais dos actos litúrxicos, durante toda a xornada terá lugar unha oración dirixida por grupos cada 20 minutos (arrincará ás 10.00 horas), nas que cada persoa poderá solicitar ao Nazareno as Tres Grazas.
O templo parroquial pecharase ás 21.30 horas co obxectivo de que todo o mundo poida regresar aos seus fogares antes do toque de queda fixado para as 22.00 horas.
