O alcalde de Pontevedra, Miguel Anxo Fernández Lores, asegurou este venres que o Concello ten preparado un "plan B" por se as autoridades sanitarias ordenan o peche do albergue que Cáritas ten en Salcedo, no que se detectou un positivo por coronavirus.
O albergue Raíña da Paz foi habilitado temporalmente, durante o estado de alarma, para acoller a persoas sen teito que pasaban a noite nas rúas da cidade.
O paciente infectado, un home de 60 anos, foi ingresado no Hospital Montecelo de Pontevedra e o resto dos usuarios, ata 25 nos últimos días, non teñen síntoma algún da enfermidade, segundo explicou Fernández Lores.
Todas as persoas que están no albergue foron examinadas e establecéronse "medidas de separación", engadiu o rexedor, para evitar que o virus poida estenderse.
Por agora, o protocolo activado por Sanidade non recomendou ningunha medida adicional ou a evacuación das persoas sen teito que pasan a noite nel.
Tras coñecerse o positivo, un equipo da Brilat acudiu ás instalacións para realizar unha desinfección urxente do albergue, tarefa para a que contaron co apoio de axentes da Policía Local de Pontevedra e voluntarios da agrupación de Protección Civil.
O Concello, segundo o alcalde, está "preparado" en todo caso por se reciben a orde de trasladar aos residentes e recolocalos noutras instalacións "se é necesario".