Cáritas Interparroquial de Pontevedra investirá máis de 700.000 euros para reformar a súa sede na céntrica rúa Joaquín Costa e poder habilitar un albergue de 26 prazas que acollerá a persoas sen fogar. Tamén disporá dun centro de día e un espazo para Proyecto Hombre.
A presidenta da agrupación interparroquial de Cáritas en Pontevedra, Concepción Vázquez, avanzou que a intención de iniciar as obras no mes de outubro.
O plan dispón xa de todos os permisos administrativos e só está á espera dunha subvención da Consellería de Política Social, valorada en 300.000 euros, para comezar os traballos da primeira fase. Unha vez que o novo albergue entre en funcionamento, pechará as súas portas o situado no barrio de Monte Porreiro.
O arquitecto autor do proxecto, Mauro Lomba, explicou este luns en rolda de prensa que a obra incluirá a rehabilitación da fachada, coa ampliación das fiestras como elemento máis destacado. Ademais instalarase un ascensor e novos despachos, as estancias do albergue situaranse na primeira planta e prepararase o patio interior para as actuacións da segunda fase.
Precisamente, este seguinte paso da restauración, aínda sen data, servirá para completar a sala de Proyecto Hombre que estará situada na planta baixa, ampliar as dependencias do centro de día, situado tamén na planta baixa; e acondicionar o patio interior.
A última parte da obra, orzada en 150.000 euros, centrarase no segundo piso do edificio, no que están proxectadas vivendas tuteladas individuais e para familias.
Ademais de mellorar a imaxe e funcionalidade do inmoble, o proxecto servirá para mellorar a calidade asistencial, de atención e de vida dos usuarios do albergue.
No seu discurso, destacou detalles do proxecto como a presenza de espazos comúns, unha cheminea e incluso un lugar para mascotas, cuxa compañía é de vital importancia para estas persoas.
No deseño do proxecto participou tamén Alberto Escobar, que destacou a colaboración de institucións e empresas como o Concello de Pontevedra, a Consellería de Política Social ou Ence. Tamén subliñou "a implicación de toda a cidadanía de Pontevedra e a súa comarca para que este prometedor proxecto poida facerse realidade canto antes nas súas tres fases".
