Pontevedra é a segunda provincia galega en volume de contratos asinados por mulleres no que vai de ano, segundo un informe de Randstad. A empresa de recursos humanos levou a cabo un estudo sobre a contratación feminina con motivo da conmemoración do Día Internacional da Muller. Para iso, comparou, entre outras, as cifras proporcionadas polo Servizo Público de Emprego Estatal (SEPE) dos últimos doce meses.
Randstad revela que as traballadoras de Galicia asinaron durante xaneiro 24.482 contratos, un 30% menos que hai un ano, cando se asinaron 34.966. Isto supón un descenso de 6,6 puntos porcentuais máis acusado que a media nacional, situada no 23,4%. Estes contratos supoñen o 4,5% do total que se rubricaron en España.
No que se refire a provincias, A Coruña (10.477) e Pontevedra (9.449), lideran os maiores volumes de contratos femininos da rexión, seguidas por Lugo (2.282) e Ourense (2.274). En canto aos descensos con respecto a hai doce meses, Lugo rexistrou o maior (-36,4%), seguida por Pontevedra (-30,5%), A Coruña (-29,8%) e Ourense (-20,4%).
A nivel nacional, Randstad destaca que o emprego feminino arrincou o ano 2023 co peor volume de contratos dos últimos doce meses, 545.154 firmas, e rexistrando desde setembro unha caída ininterrompida do 30,2%.
A hostalería (78.495), o comercio (72.482) e o sector sanitario (71.258) supoñen o 40% de todos contratos asinados por mulleres en España.
