O paseo fluvial entre Monte Porreiro e Bora converteuse nunha trampa para os ciclistas que este mércores percorreron a senda que discorre paralela ao río Lérez. Unha "sementa" de chinchetas ocasionou a picada das rodas de polo menos unha decena de bicicletas.
A situación foi denunciada a través das redes sociais por varias persoas que observaron as tachuelas no chan e presenciaron como os ciclistas tiñan que parchear as cámaras das súas bicicletas (algún deles das dúas rodas) para poder reiniciar a marcha.
Algúns dos comentarios que efectuaron estas persoas evidencian a súa preocupación polo perigo que supoñen os clavillos esparexidos polo paseo fluvial. "Non só amolan aos ciclistas, porque tamén hai familias cos seus fillos, xente correndo, cans e xente maior" que gozan do carreiro fluvial. "Deberiamos respectarnos os uns aos outros e gozar todos do que temos", sinala un dos camiñantes.
Nesta mesma liña, outro dos veciños que frecuenta o carreiro fluvial sentenza que "non está ben pór chinchetas nos camiños, porque podes danar a unha persoa ou unha mascota", aínda que matiza que, en canto aos ciclistas, no mesmo comezo da senda, uns metros antes da estación de bombeo, hai un cartel de dirección "prohibida", o cal engloba as bicis de montaña, que non deben circular por elas. Neste sentido, puntualiza que "estarían permitidas bicicletas infantís que non excedan a velocidade de camiñar a pé".
Algunhas das persoas que denunciaron a situación ilustraron os seus comentarios con fotos, entre elas a dunha chincheta cravada nunha zapatilla de deporte.
