O Ministerio de Defensa e a Xunta de Galicia acaban de reeditar o convenio de colaboración que iniciaron no ano 2007 para que patrullas militares contribúan na prevención e detección de incendios forestais na comunidade autónoma. A campaña dará comezo o próximo día 15 e prolongarase ata o 30 de setembro.
O despregamento estará composto por uns 460 militares repartidos en 27 patrullas (dun cabo e un soldado) integradas por efectivos da Brigada Galicia VII do Exército de Terra (a Brilat) e do Terzo Norte de Infantería de Mariña, quen se ocuparán de vixiar toda a xeografía galega colaborando, mediante unha presenza disuasoria e de alerta temperá, na prevención de lumes naquelas zonas consideradas de maior risco.
Coa presenza destas patrullas nos montes galegos, nos últimos anos produciuse un significativo descenso do número de incendios forestais en toda a zona. O despregamento poderá activar forzas e medios en tres niveis de intervención en función da gravidade da situación e igualmente prevé a presencia de avións non tripulados e de helicópteros para labores de vixilancia.
Doutra banda, e para asegurar a necesaria coordinación con outros equipos e medios da Xunta de Galicia e coas Forzas e Corpos de Seguridade do Estado, o dispositivo militar contará cos medios de comunicacións adecuados que permitan dar resposta inmediata en caso de producirse un conato de incendio ou de detectarse actividades sospeitosas de producir un incendio.
A campaña comeza o día 15 e chegará ao 30 de setembro
TAMBIÉN A UME. A maiores desta achega do Ministerio de Defensa en labores de prevención, a Unidade Militar de Urxencias (UME) manterá un dispositivo permanente en Galicia con capacidade de loita contra incendios que puidese ser reforzado de forma case inmediata se a situación así o aconsella.
Para iso, destacará unha unidade de intervención de entidade sección, na Base Xeral Morillo de Figueirido, á que se sumarán de forma permanente durante toda a campaña medios apagalumes do 43 Grupo de Forzas Aéreas, estes despregados no aeroporto de Lavacolla, en Santiago de Compostela.
BALANCE DE 2009. A operación Sentinela repetirá este ano o período do exercicio anterior cando comezou a mediados de agosto en vez do 15 de xullo, como adoitaba ser habitual. O motivo: que o desgoberno en Madrid xerou problemas administrativos, segundo xustificara a Xunta.
Un argumento que non se produce nesta ocasión sen que desde a Consellería de Medio Rural deuse outra explicación ao atraso na activación da campaña.
En calquera caso, o baile de datas non foi impedimento, o pasado ano, para que o balance fose en grao sumo satisfactorio. Os militares que percorreron os montes da Coruña, Ourense e Pontevedra durante 90 días cumpriron o seu obxectivo con nota, ao protagonizar máis de 80 avisos relacionados con incendios, conatos, queimas indebidas de restrollos, presenza de persoas sospeitosas ou de material incendiario nas súas áreas de competencia, que coinciden cos emprazamentos nos que, historicamente, o lume ataca ao monte con maior intensidade en Galicia.
A vixilancia incluíu medio centenar de voos por parte do Raven, a aeronave non tripulada que permite a observación a distancia dos puntos menos accesibles. "Hai que resaltar o eficaz labor de vixilancia e disuasión que realizan as patrullas, así como a boa aceptación que, ano tras ano, demostran os cidadáns, circunstancia que foi posta de manifesto por todo o persoal participante na operación", sinalaron entón fontes da Brilat, quen agradeceron a estreita colaboración por parte das autoridades dos 33 municipios implicados, nos que os soldados percorreron uns 6.500 quilómetros diarios.
As patrullas militares non están autorizadas a combater directamente os lumes, senón que teñen encomendada a vixilancia e o mantemento dunha presenza disuasoria nas zonas asignadas para ofrecer unha alerta temperá ante posibles conatos incendios forestais, facilitando información aos servizos de extinción. De igual modo, o seu papel limítase a notificar ás forzas e corpos de seguridade acerca daqueles individuos que puidesen estar implicados na provocación de incendios intencionados.
En 2018, con dúas semanas máis de duración, na Sentinela participaron preto de 500 militares que percorreron 500.000 quilómetros.
