"¿Como estamos, familia? ¡Quero ver esas mans no aire!". Esas foron as primeiras palabras que o cantante sevillano Beret dedicaba este sábado a unha Praza de España abarrotada de xente para celebrar a penúltima xornada musical das Festas da Peregrina 2019.
Paradoxalmente, o tema inicial co que saudou ao público pontevedrés foi Bye bye, que provocou unha imaxe composta por centos de brazos ondeando ao son da música. Mentres tanto, gran cantidade de pantallas gravaban ao artista e numerosos grupos de mozos coreaban o segundo tema do concerto, Sentir, ao unísono. Para moitos deles a motivación sería dobre logo de vir doutras comunidades de España só para velo tocar e de levar esperando desde as 10.00 horas da mañá para reservar o seu sitio en primeira fila. Coa axuda dunha pantalla que recollía as letras do repertorio do seu último disco, Ápices, o mozo aludía á necesidade de quedar co ‘esencial': "A complexidade nunca foi sinónimo de felicidade".
Co reggae ou o rap como anteriores estilos dominantes no seu repertorio, Beret non deixa de aproximarse cada vez máis ao pop urbano, con ritmos que lograron unha moi boa acollida, especialmente por parte do público adolescente, unha realidade reflectida nas máis de 200 millóns de visualizaciones que lograron obter os seus videoclips en Youtube. Javier Beret empezou colgando as súas gravacións caseiras na rede ata chegar a asinar co xigante discográfico Warner Music Group en 2018. O seu innegable éxito vai en crescendo: con tan só tres álbums, o cantante de 22 anos fíxose con cinco discos platino e dous discos de ouro.
Vuelve, a gran esperada da noite, provocou que a demora rendese na emoción da ateigada praza. Lo siento foi o tema que fixo estalar a bomba ao posibilitar a entrada do artista sevillano na lista dos 40 o pasado ano. E da mesma forma que na radio comercial, o hit conseguiu pór o punto e final ao concerto desatando a euforia e a exaltación de miles de persoas.
