O Servizo Galego de Saúde (Sergas) inicia este martes un cribado con PCR a preto de 2.700 alumnos de primeiro e segundo de bacharelato de varios centros educativos de Pontevedra, Poio, Marín, Sanxenxo, Cambados e O Grove.
Esta campaña preventiva, segundo informa o Sergas nun comunicado, desenvolverase ata o 11 de decembro, período no que o persoal sanitario acudirá a varios institutos para tomar mostras a alumnos.
O motivo é a situación epidemiolóxica da área sanitaria de Pontevedra e O Salnés, cunha "alta incidencia" de casos en varios municipios e unha "porcentaxe elevada" de PCR positivas. De aí o interese por realizar cribados poboacionais a colectivos "con rangos de idade que presentan incidencia acumulada elevada", para detectar o maior número posible de portadores asintomáticos da covid-19. Un dos grupos de idade máis afectado é o de mozos con idades comprendidas entre os 15 e os 25 anos.
O cribado desenvolverase, nunha primeira quenda, nos institutos de secundaria A Xunqueira I e II, Sánchez Cantón, Luís Seoane, Frei Martin Sarmiento, Valle Inclán, Torrente Ballester, Sagrado Corazón e Los Sauces. A segunda comprenderá aos institutos de Marín, Sanxenxo, Cambados, O Grove e Poio. De ser necesario, a iniciativa estenderíase a mediados de decembro a outras localidades.
