Serviocio deberá baixar as súas tarifas un 2,5% no complexo deportivo de Campolongo, no que se atopan as únicas piscinas públicas da cidade. A redución dos prezos podería aplicarse desde este mesmo mes, xusto despois de que se formalice o novo contrato para a xestión destas instalacións. O portavoz municipal, Raimundo González Carballo, avanzou este luns que o Concello está en disposición de asinar a nova concesión esta mesma semana, o que significaría que a nova política tarifaria entraría xa en vigor.
A formalización da adxudicación, que superou dous recursos administrativos en contra, levará novas obrigacións para a empresa. Entre elas, o pago dun canon de 60.000 euros ao ano durante as próximas dúas décadas á Administración local e o investimento de máis de 4,6 millóns de euros na reforma integral das piscinas.
Unha vez subscrito o contrato, Serviocio terá 40 días para entregar o proxecto de reforma das piscinas. A partir de entón poderán dar comezo os traballos, que implicarán o peche das instalacións por un período máximo de seis meses. Todo o persoal do complexo será subrogado.
