O servizo de Oncoloxía do Complexo Hospitalario Universitario de Pontevedra demanda reforzos, non só a nivel de espazo, senón de persoal. Na actualidade traballan na unidade sete oncólogos e un residente en formación por ano, que só conseguen atender a lista de espera de pacientes a base "de sobreesfuerzos".
Así o denunciou este mércores Francisco García Arroyo, un dos especialistas en Oncoloxía que traballa no Hospital Provincial e que, entre outras cousas, incidiu en que nos últimos dez anos "a atención oncolóxica duplicouse". Sobre todo, a causa do envellecemento da poboación, posto que o cancro ten máis incidencia nos maiores e agora, a diferenza de outrora, os pacientes añosos trátanse.
►O Provincial recibe a Don Amable, o carriño solidario da Asociación contra o Cancro
O ano pasado diagnosticáronse na área de sanitaria 1.279 casos novos, cando fai cinco exercicios contabilizábanse 917, case un 40% menos. En cambio, neste tempo o persoal non evolucionou de forma proporcional á incidencia, de modo que os profesionais manteñen a "petición continua" de máis persoal. "O incremento de pacientes fai que a contratación de oncólogos sexa moi necesaria", subliña García Arroyo.
A atención dos diagnósticos novos "non ten lista de espera" e os pacientes son vistos "no curso de sete e oito días". En cambio, na sala de tratamentos si se podería formar cola de non ser polo esforzo dos profesionais.
"Detéctase certa aglomeración polo número de pacientes que se van acumulando, de persoas que se curaron ou de seguimentos longos"
O número de tratamentos tamén creceu á alza, de forma que hoxe no hospital do día do Provincial adminístranse unha media de 60 de sesións diarias de quimioterapia; 45 na quenda de mañá e uns 15 no da tarde, o que "provoca que haxa bastante aglomeración, atrasos e problemas". Os profesionais ven incluso "excedidos" pola demanda asistencial pero, en palabras de García Arroyo, non se chega a formar lista de espera para recibir tratamento "por ese sobreesfuerzo de oncólogos e enfermeiras".
Como ten transcendido en varias ocasións, a sala queda moitas veces "pequena" dado que foi creada no ano 2000, cando a incidencia da enfermidade era menor. Con todo, albíscanse bastantes máis problemas é na área de consultas externas, sobre todo á hora de facer o seguimento dos pacientes que xa foron ou están a ser tratados. Ao parecer, aquí detéctase "certa aglomeración polo número de pacientes que se van acumulando, de persoas que se curaron ou de seguimentos longos".
As últimas previsións da Sociedade Española de Oncoloxía Médica apuntan cara a un "incremento progresivo" dos casos de cancro de entre o 5% e o 10%
A construción de Gran Montecelo prevé mellorar as instalacións do servizo, pero García Arroyo insiste: "O persoal non se soluciona cun novo lugar" e en Oncoloxía "necesítase máis xente traballando".
Para máis inri, as perspectivas de futuro non son nada prometedoras. A Sociedade Española de Oncoloxía Médica publica "as cifras do cancro de cada ano" e as últimas previsións apuntan cara a un "incremento progresivo" dos casos de cancro de entre o 5% e o 10% durante os próximos dez anos. Entre os tumores en pacientes novos detectados o ano pasado, os de maior incidencia foron os de colon (190), mama (186), pulmón (120), gástrico (50) e cabeza e pescozo ou otorrinos (45).
TRATAMENTOS. Onde si hai mellores sensacións é na área de tratamentos, "que foron mellorando" co paso do tempo. Os últimos avances lograron chegar " curación" dalgúns tumores e " cronificación" doutros que fai tan só uns anos limitaban drasticamente a esperanza de vida.
En 2018 destináronse 9.075.494 euros ao pago de fármacos para pacientes oncolóxicos
Isto supuxo un incremento do gasto. Concretamente, en 2018 destináronse 9.075.494 euros ao pago de fármacos para pacientes oncolóxicos, entre os que destacan as distintas elaboracións de quimioterapia e os recursos destinados á inmunoterapia, un tratamento de nova xeración que xa se receita para entre o 20% e o 30% dos pacientes. O total orzamentario significa un incremento do 21,2% sobre 2017.
Ligado con isto, cabe destacar que o servizo de Oncoloxía ofreceu o ano pasado 15.121 sesións de tratamentos no hospital de día (a maior parte de quimioterapia), a razón de 61 ao día. En canto a consultas, o servizo contabilizou o ano pasado 7.199 citas sucesivas (as que se conceden a pacientes xa controlados) e 940 consultas de enfermería. A estas débense sumar as 1.538 consultas sucesivas ofrecidas no Salnés, o que arroxa unha media diaria de 37 consultas.
Pola súa banda, o xerente da área sanitaria, José Ramón Gómez, incidía este mesmo mércores en que o Sergas fixo esforzos para favorecer o a "detección precoz" do cancro co "fin de obter mellores resultados". Así, implantou varias vías rápidas para que un paciente con sospeita de sufrir un tumor sexa diagnosticado e avaliado para o seu tratamento no prazo máximo de 15 días.
