Simón Venzal Contreras tomou posesión este venres do seu posto como novo coronel xefe da comandancia da Garda Civil en Pontevedra. Substitúe no cargo ao tenente coronel Manuel Touceda, que, de xeito provisional, asumira esta responsabilidade tras a xubilación do seu predecesor, Jorge González.
Venzal Contreras, que ata agora estaba destinado no servizo de Costas e Fronteiras da Garda Civil en Madrid, foi recibido pola subdelegada do Goberno en Pontevedra, Maica Larriba, que lle desexou todo o mellor á fronte da comandancia.
O coronel sinalou que é unha "honra" e un "privilexio" asumir o mando da Garda Civil en Pontevedra, provincia que ten unha "problemática diversa" e unha xeografía "complicada". "Veño a manter o nivel ou a intentar mellorar naquilo que poida contribuír modestamente", sinalou Simón Venzal, que ve o seu novo posto como "un reto" ante a existencia de fronteiras "moi variadas" na provincia.
O novo coronel xefe, que explicou que visitara a comandancia de Pontevedra "non hai moito" polo seu cargo en Costas e Fronteiras, sinalou que o servizo se presta "en moi boas condicións" por parte de todas as unidades, un labor "excelente" que pretende manter nos próximos anos.