O bo facer de Gonzalo Boye, o avogado que comparten José Ramón Prado Bugallo, Sito Miñanco, e Carles Puigdemont, non foi suficiente para que o capo máis famoso de todos os tempos poida eludir a acción da Xustiza. Oito meses despois do adiamento da vista oral que se iniciou na Sección Segunda da Audiencia de Pontevedra, o mesmo tribunal retomará o proceso na semana do 25 de outubro, tras o ditame acordado polo Tribunal Superior de Xustiza de Galicia.
O letrado de Miñanco expuxo como cuestión previa a posible prescrición do delito que se atribúe ao seu patrocinado, argumento que caeu en saco roto. Paralelamente, expuxo unha presunta contaminación do presidente do tribunal, José Juan Barreiro Prado, e dunha das maxistradas, por resolver unha cuestión de competencia na primeira fase das investigacións. O TSXG avalou a tese da Fiscalía e do propio tribunal pontevedrés, que entendían que o citado fallo non lles serviu para coñecer en absoluto o fondo do asunto que xulgarán no prazo dun mes no Pazo de Xustiza de Pontevedra.
Xunto a Prado Bugallo, volverán sentar no banco dos acusados a súa exmuller, unha das súas fillas, a súa excuñada e José Alberto Aguín Magdalena, O Rubio de Aios, que, para os investigadores, é o principal home de palla do narcotraficante na zona do Salnés.
O cambadés, que comparte avogado con Carles Puigdemont, enfróntase á perda de boa parte do seu patrimonio
A investigación que acabará coa sentenza da sala segunda da Audiencia pontevedresa partiu da Operación Suntuarias, unha batería de procesos iniciados pola Axencia Tributaria (liderada naquel momento por Luis Pazos) e a Fiscalía Especial de Delitos Económicos (coordinada por Augusto Santaló). Facenda observou patrimonios de orixe inxustificada en persoas con antecedentes por tráfico de sustancias estupefacientes e, tirando do fío, logrou sentar no banco a moitos deles. 'Tucho' Carballa, Los Abalos, os familiares de Manuel Barroso Millán ou Marcial Dorado xa foron condenados por iso, o mesmo que a gran rede do desaparecido José Antonio Pouso Rivas, Pelopincho. Restan por comparecer, ademais de Miñanco, Los Charlines, cuxo proceso foi derivado á Audiencia Nacional nunha peza separada, a Operación Repesca.
En canto á rede que será xulgada a partir do 25 de outubro, as pescudas céntranse na inmobiliaria San Saturnino, unha empresa a cuxo nomee figuran a maior parte dos inmobles que os investigadores atribúen a Miñanco, non só naquel momento, senón tamén na máis recente Operación Mito.
Dita axencia, creada polo cambadés nos anos 80 e que volveu ser rexistrada o 5 de febreiro de 2018, serviría ao narco para acumular un inmenso patrimonio inmobiliario que agora podería perder, entre o que se achan pisos en pleno centro de Pontevedra, en Cambados e en Sanxenxo, ademais da súa xoia da coroa, o chalé que empregaba como centro de mando nos últimos alixos que presuntamente dirixiu no ano 2017, situado a poucos metros da praia de Montalvo.
Sito, que conta con dúas condenas moi importantes por tráfico de cocaína (foi detido en 1991 e en 2001 relacionado con grandes cargamentos procedentes de Colombia) está de novo en prisión tras a mencionada Operación Mito, o maior golpe antidroga da Policía Nacional na presente década e que se saldou con 52 detencións en toda España, incluída toda a infraestrutura que o narcotraficante lograra recuperar nas rías galegas para a introdución de cantidadesdescomunais de po branco.
