Unhas 50 motos e ao redor de 80 persoas entre condutores e pasaxeiros participaron este domingo en The Distinguished Gentleman's Ride, un evento benéfico de carácter internacional reservado a motos clásicas, de espírito clásico ou clásicas modernas, destinado a recadar fondos para as investigacións levadas a cabo pola Fundación Movember contra o cancro de próstata, a depresión e o suicidio.
Nesta edición foron 29 as cidades españolas que se sumaron á iniciativa, aínda que en Galicia a única foi Pontevedra. E para ser a primeira edición, a capital do Lérez non defraudou, tal e como destacou este domingo un dos promotores, Xavier Vandeneycken.
"A resposta foi moi positiva e, ademais, case todos acudiron vestidos co estilo distinguido que require este evento. Tamén tivemos sorte co tempo e houbo moi bo ambiente, así que foron moitas as persoas que se achegaron a ver as motos. Quizá a recadación non sexa moi elevada, pero o importante é atraer a atención e visibilizar estas enfermidades", sinalou Vandeneycken.
De feito, os promotores xa están a pensar en repetir o próximo ano en Pontevedra, onde a actividade contou co apoio da Concellería de Deportes. O edil responsable da área e tenente de alcalde, Tino Fernández, aproveitou a ocasión, como tantos outros afeccionados, para achegarse á Praza de España a gozar deste "espectáculo único" e incluso se animou a probar algunha das motos. "É unha grande noticia que os organizadores australianos engadisen este ano a Pontevedra na lista de 29 cidades españolas que participan neste evento, que se celebra o mesmo día en todo o mundo e que nestes 12 anos recadou máis de 30 millóns de dólares. Este tipo de concentracións moteiras teñen moitísimos seguidores e seguidoras, polo que, llas conseguimos afianzar, pódense converter nun verdadeiro atractivo turístico para a nosa cidade. Asemade, no caso desta Gentleman's Ride estamos a colaborar directamente na loita contra patoloxías que afectan a moitísimas persoas", indicou o socialista.
Unhas 50 motos e 80 persoas participaron na primeira edición pontevedresa, que aspira a repetir o próximo ano
Xunto a Pontevedra e outras 28 cidades españolas, nesta ocasión sumáronse 110 países e máis de 1.000 urbes en todo o mundo. "En todas elas, cada moteiro puido realizar unha doazón ou conseguir un patrocinio para a Fundación Movember a fin de desenvolver programas de investigación contra o cancro de próstata e para frear os fenómenos do suicidio e a depresión", detallou un dos promotores.
Nesta primeira edición pontevedresa, o evento contou co patrocinio do box Crossfit Pontevedra e a tenda e taller de motos Monster Bike, así como coa colaboración da axencia IdeaWeb, todas elas empresas locais.
