Un home de 31 anos foi detido pola Policía Nacional de Pontevedra tras agredir brutalmente á muller que o sorprendeu mentres roubaba no interior do seu coche, un vehículo que estaba aparcado na rúa.
Segundo informou a comisaría de Pontevedra, ao detido, que ten múltiples antecedentes por feitos similares, impútaselle un delito de roubo con violencia.
O suceso produciuse o pasado 3 de novembro cando a vítima, no momento que chegou á zona na que aparcara o seu coche, viu a unha persoa co corpo metido na parte traseira do seu vehículo.
A muller tratou de retelo pero o individuo saíu do vehículo e golpeouna coa porta de forma violenta.
A vítima, segundo traslada a Policía Nacional, comezou a berrar pedindo axuda e forcexou co ladrón para arrebatarlle algunhas das cousas que lle subtraeu e, tras conseguilo, intentou escapar pero a súa agresor saíu correndo detrás dela.
Cando a alcanzou, abalanzouse sobre ela, tirouna ao chan e comezou a agredila con puñadas á altura do ventre, arrebatándolle os obxectos que levaba e o seu bolso, tras o cal saíu fuxindo en dirección á ponte do Burgo. Os axentes, ao chegar ao lugar, pediron unha ambulancia para que a vítima fose asistida.
Tras a investigación policial, o ladrón foi identificado e detido este martes, nove días despois do roubo, e foi posto a disposición da autoridade.
