A Plataforma de Afectados pola Covid (PAC) marchou este venres polas rúas de Pontevedra para reclamar máis apoio por parte das institucións a autónomos e pemes. Deste xeito, o colectivo, que abarca a diferentes sectores que se viron especialmente afectados pola irrupción da pandemia, repetiu algunhas das demandas que veñen reivindicando nas últimas semanas, como a baixada ou exoneración de certos impostos ou a suspensión das cotas de autónomos mentres duren as restricións.
"Queremos que as institucións estean á altura das circunstancias", explicaba Jacobo Barragáns o venres, que falou da necesidade de prolongar as axudas para que sexan "continuadas mentres isto non termine". Neste sentido, o integrante da plataforma explicou que mantiveron un encontro co Concello para falar acerca das axudas do plan Supera20. "Foi un encontro satisfactorio no que se escoitaron as nosas propostas", explicou Barragáns, que non quixo dar máis detalles sobre o contido do encontro, aínda que si dixo que o Concello mantivo a súa postura de non suspender o pago de taxas e impostos municipais.
Algúns dos integrantes da asociación de empresarios da hostalería, Hoempo, participaron este venres na manifestación a título individual. E é que o calendario de protestas continuará en Pontevedra durante semanas, con manifestacións convocadas por un ou outro colectivo. Hoempo, pola súa banda, xa anunciou que intensificará a presión sobre o Concello para que aprobe unha exoneración de taxas de lixo e veladores emulando as medidas tomadas noutros concellos veciños. Ademais, sinalan ao comité clínico que decide as condicións nas que abre a hostalería. "Queremos saber cal é o seu criterio", indicaba o xoves a portavoz de Hoempo. A asociación ten previsto realizar manifestacións os luns de todas as semanas de decembro entre a Xunta e o Concello.
