Meteogalicia mantén activa unha alerta amarela por fortes ventos na tarde deste mércores na Costa da Morte, así como por altas temperaturas durante a segunda metade do xoves no sur da provincia de Pontevedra.
Segundo informa este organismo dependente da Consellería de Medio Ambiente, as altas presións traerán de novo a Galicia aire cálido procedente do sur da Península Ibérica, polo que se rexistrarán de novo temperaturas elevadas no sur da comunidade.
Antes, este mércores, está activada a alerta amarela por vento do nordés no mar, de forza sete, na zona da Costa da Morte, que soprará a partir das 12.00 horas e repetirase durante a tarde do xoves.
Tamén o xoves estará activa a alerta amarela por temperaturas superiores aos 34 graos na área litoral de Pontevedra e na zona de Baixo Miño, na mesma provincia.
