A gráfica da pandemia debuxa agora mesmos picos opostos. Os casos activos e as hospitalizacións evolucionan á baixa, pero non así os falecementos, que seguen subindo, formando a que parece a última crista da terceira onda da covid.
A serie histórica demostra que as primeiras dúas semanas de febreiro están a bater todas as marcas de mortalidade, ata o punto de que a media diaria de falecidos por covid duplicouse na área sanitaria de Pontevedra e O Salnés, alcanzando unha media de dous mortos ao día
En xaneiro contabilizáronse 35 mortes en Montecelo e o Hospital do Salnés, o que arroxa unha media que segue sendo alto, pero que é sensiblemente inferior, de aproximadamente un falecemento diario.
As estatísticas ratifican unha vez máis que o coronavirus vai batendo plusmarcas en diferentes tempos. Primeiro chega a onda de diagnósticos e casos activos, despois a onda de hospitalización, logo a de entradas nas unidades de críticos e finalmente a de falecidos. Os modelos matemáticos invitan a pensar que a área afronta a recta final da terceira onda, pero no contexto actual as premonicións colgan dunha liña moi delgada. Segue habendo moitos pacientes ingresados que poden ver como o seu estado se complica e está por ver o impacto das cepas importadas. A previsión oficial é que a finais de mes o 50% dos contaxios sexa xa motivado pola variante británica, ata dez veces máis contaxiosa que o coronavirus clásico.
O que si está demostrado é que esta terceira onda afecta a poboación bastante máis nova. Presúmese que unha das razóns é porque hai máis casos e, por extensión, máis positivos en mozos. E doutra banda sospéitase que as variantes circulantes do virus poden aprender a atacar pacientes de menor idade que os afectados nas primeiras dúas ondas. Sexa como sexa, o certo é que dous de cada tres ingresados en coidados críticos ten menos de 65 anos e que a media de idade dos falecidos no que vai de mes aproxímase aos 74 anos, unha media máis baixa que o que se alcanzou nas ondas de primavera e outono. De feito, foi en febreiro cando a área sanitaria rexistrou o falecemento da persoa máis nova, un home de 31 anos, e a morte case consecutiva de tres homes menores de 60 anos (os pasados martes e mércores).
MENOS CONTAXIOS. Pola contra, os casos activos baixaron notablemente nas últimas xornadas. O Sergas comunicou este venres que existen 2.027 casos activos, que son 114 menos que o día anterior e case 600 menos que os do venres pasado, cando se chegou ao pico de activos de toda a pandemia, con 2.613 casos.
Desde entón, a incidencia baixou un 20% e, segundo apuntan expertos da área, a caída real é incluso maior, entorno ao 40%, xa que moitos pacientes xa superaron a enfermidade, pero seguen constando como casos activos porque a súa alta aínda non foi comunicada de forma oficial. O sistema, como o de moitas outras áreas, viuse desbordado pola avalancha de diagnósticos e críticos ocorrida hai unhas semanas.
As hospitalizacións tamén descenderon. Entre o mércores e o xoves foron dados de alta 14 pacientes que estaban ingresados nos hospitais da área. Montecelo pasou de atender 95 a 84 pacientes e o Hospital do Salnés de 9 a 6, mentres o Hospital Quirónsalud Miguel Domínguez continúa con 10.
As unidades de críticos de Montecelo seguen con 20 pacientes coa enfermidade activa. A cuarta UCI incluso foi liberada de covid, aínda que existe a dúbida de se fará falta recuperar esta unidade para novos ingresos de pacientes graves. A pesar da melloría dos parámetros nas últimas horas o Sergas localizou na área sanitaria 83 positivos novos de covid.
