O sindicato Comisións Obreiras, que ostenta a maioría sindical en Ence, reunirase nos próximos días coa vicepresidenta cuarta do Goberno e ministra para a Transición Ecolóxica, Teresa Ribeira. Polo menos ese foi o compromiso que os traballadores recibiron o delegado do Goberno en Galicia, Javier Losada, ao termo da mobilización do pasado venres polas rúas da Coruña, que se prolongou durante sete horas. "Foi a máis extensa na historia da cidade, segundo opinión da subdelegada Pilar López-Rioboo", apunta José Luís García Pedrosa.
En concreto, máis dun centenar de persoas participaron nesta mobilización, convocada por CCOO baixo o lema PSOE Entérate!! Ence non se pecha!!, na que mostraron o seu rexeitamento ao artigo 18 da futura Lei de Cambio Climático e Transición Enerxética.
"Os traballadores ocuparon a rúa con firme determinación ata que ás 17.30 horas chegou un compromiso por escrito; foi a condición requirida para dar por finalizada unha concentración que se iniciara ás 11 horas, e que tivo varios intentos de disolución por parte dá Policia Nacional, que non chegou a actuar en ningún momento", recorda Pedrosa.
O delegado do Goberno recibiu a cinco sindicalistas -a presidenta do comité das oficinas de Ence, Ana Cedeira, así como Eloy Santos e Óscar Igrexas, por parte do sector do transporte de madeira, e Rafa Díaz e Manuel Ramacháns, por parte do sector forestal- nunha reunión dunhas dúas horas.
Entón os sindicalistas solicitaron a celebración dun encontro coa ministra para a Transición Ecolóxica, algo que "se conseguiu despois de novas xestións". No entanto, aínda non hai data para esta reunión, aínda que fontes da organización confían en poder mantela canto antes.
A pesar diso, CCOO avanza que manterá intacto o calendario de mobilizacións e incluso se intensificará nos próximos días. Unha delas será fronte ao propio Ministerio o vindeiro venres, día 12.
