Os traballadores do servizo postal de Correos e Telégrafos están chamados a mobilizarse o próximo 7 de xuño ante o "desmantelamento e precarización" do servizo. Eusebio Cousillas, CC OO, José Corbacho, de UXT, Guillermo Mesejo, do Sindicato Libre, e Santiago Martínez, de CSIF, sindicatos que representan ao 85% do persoal, denunciaron este mércores un recorte de 180 millóns de euros nos dous últimos anos, que implica a supresión do servizo en zonas da provincia, o peche de oficinas, un exceso de temporalidade e a implantación de mini jobs.
"Correos, como servizo público, non está na axenda dos políticos", asegura Cousillas. Trátase dunha situación que temen repítase este ano, xa que a negociación entre o Goberno central e as forzas políticas dos Prespuestos Xerais do Estado aínda segue adiante.
Os recortes xa afectan a Pontevedra, con redución do horario de atención ao público de oficinas como a da Lama
Estes recortes xa afectan a Pontevedra, con redución do horario de atención ao público de oficinas como a da Lama, e fan perigar outras como a de Seixo. Ademais, denuncian que desde 2011 perdéronse 186 postos de traballo fixos na provincia e aumentaron os contratos eventuais.
Os sindicatos coinciden en que os recortes están a afectar ao persoal, que se ve obrigado a asumir unha carga de traballo sobredimensionada, sobre todo nas zonas rurais, unha situación que provoca atrasos nas entregas. "Temos a obrigación de repartir o 93% do correo nun máximo de tres días e os contratos a tempo parcial, a falta de persoal... Están a facer que os compañeiros non poidan facer as zonas a diario", explica Santiago Martínez.
A estas reclamacións únense a conxelación do Convenio Colectivo e o Acordo Funcionarial ou o bloqueo do plan estratéxico, problemas que "están a converter a Correos nunha empresa low-cost".
Os paros do 7 de xuño serán de dúas horas en cada quenda e haberá unha concentración fronte á Subdelegación do Goberno ás 13.30 horas. Ademais, os traballadores anuncian tres folgas xerais a finais de ano no caso de que a situación non mellore.
