Os traballadores de Ence moverán "todos os fíos" que están ao seu alcance e chamarán a todas "as portas" necesarias para conseguir "unha reunión" co presidente do Goberno, o socialista Pedro Sánchez.
Así o avanzou este venres a presidenta do comité de oficinas da empresa, Ana Cedeira, durante unha mobilización que pretendía formar unha cadea humana ao redor das institucións anti Ence, pero que finalmente deu lugar a unha manifestación itinerante polas sedes do Concello, a Subdelegación do Goberno, todas elas contrarias á permanencia da pasteira en Lourizán.
O anuncio transcendeu apenas dous días despois de celebrar un encontro coa ministra de Traballo, Magdalena Valerio, durante a súa visita a Pontevedra. O persoal quere subir un escalafón máis e verse as caras co máximo responsable do Goberno para intentar redirixir o futuro da fábrica. Os últimos movementos xogan claramente na súa contra. A Avogacía do Estado retirouse na defensa xudicial da prórroga que concedeu o Goberno de Rajoy e a modificación do Regulamento de Costas que está en trámites pecha as portas á continuidade da planta de celulosas.
A falta de coñecer o éxito da organización da cita, os traballadores celebraron onte un "acto simbólico para que os políticos reflexionen sobre as decisións que toman detrás dos muros (...) e que afectan a 5.000 pais e nais de Galicia e a case 800 traballadores de Pontevedra e a súa comarca", indicou o presidente do comité de empresa da fábrica, Ignacio Acuña. "Os políticos deben ser parte da solución, non do problema", engadiu.
"SOMOS HÉROES". A mobilización partiu do vello Consistorio, bordeou a Subdelegación, continuou pola Deputación e seguiu ata a sede do Concello; o número 30 da rúa Michelena, no que as aclamacións subiron o ton. A protesta finalizou no monumento da Praza de España que está dedicado aos heroes de Ponche Sampaio, onde Cedeira leu un manifesto. "Nostros tamén somos heroes e imos defender os nosos postos de traballo as veces que faga falta", comezou dicindo.
O discurso de clausura volveu pór o acento nos efectos colaterais do peche da pasteira, "unha traxedia para os traballadores e as súas familias, pero tamén para a cidade e a comarca. Perderíanse miles de empregos".
Cedeira advertiu de que os traballadores non van consentir "a ningún político que xogue cos nosos empregos" e, aínda que eran poucas as dúbidas da quen ía dirixido a mensaxe, deu nomes e apelidos. "Nin Lores, nin Tino Fernández nin a APDR vannos a calar (...). Estes impresentables son os que se teñen que marchar, non nós (...). Son unhas garrapatas ou, como se di no monte, que aquí hai moitos forestais, carrachos. Ence non se irá de Lourizan".
Os representantes dos traballadores replicaron a Lores, "que o outro día preguntaba se había novo traballando en Ence". "Aquí pode coñecer a algúns. A media de idade está por baixo dos 40", sinalou Acuña. "Di que somos un 1% do traballo, pero é unha grave irresponsabilidade por parte dun alcalde, do mesmo xeito que o é que Tino Fernández díganos que somos unha charanga", concluíu Cedeira.
Apoio ‘popular'
O candidato do PP á Alcadía, Rafael Domínguez, e o seu número dous, Pepa Pardo, apoiaron a mobilización dos traballadores e mantiveron un breve encontro cos presidentes dos comités de empresa, Ana Cedeira e Ignacio Acuña.
