A Residencia de Maiores de Campolongo non acepta máis demoras. Así o denuncia o comité da Consellería de Política Social en Pontevedra, que este mércores se concentrou na entrada do centro xunto a unha ampla representación de traballadores para reiterar a necesidade urxente de mellorar as instalacións e ampliar persoal. "Hai que actuar", subliñaron varios dos denunciantes.
As promesas feitas por Política Social quedáronse en papel mollado. O anterior conselleiro, Rey Varela, visitou o centro, para logo admitir no Parlamento que había necesidades que atender. O seu departamento chegou a elaborar unha listaxe coas obras que prevía executar, pero oito meses despois só se realizaron "actuacións menores", como a colocación dun lavalouzas no comedor. A actual conselleira, Fabiola García Martínez, aínda non contestou as súplicas dos traballadores.
A avaría dos ascensores impide a socialización dos internos con problemas de mobilidade
Entre as demandas máis imperiosas, o persoal destaca que o centro carece de tomas de osíxeno e de tomas de aspiración nas habitacións de internos, polo que moitos usuarios, sobre todo os que reciben alimentación encamados, ven como o risco de falecemento "aumenta exponencialmente".
O comedor do cuarto piso atópase "colapsado" por un mobiliario "inapropiado" e nese mesmo andar non existe sala de estar, co cal, os internos "pasan todo o día na mesma cadeira onde comeron". Na planta de asistidos hai un só baño preparado para pacientes xeriátricos, o que obriga aos residentes "a que fagan cola para ser aseados". E o servizo de ascensores non só é insuficiente, senón tamén "deficiente". O sobreuso dos elevadores provoca colapsos e constantes avarías, que deixan "incomunicados" aos internos con problemas de mobilidade que están nas plantas de arriba. "Non poden baixar a relacionarse con pacientes porque o colapso dos ascensores é absoluto", denunciou Francisco Núñez, membro do comité.
O montacargas que transporta a comida tamén move cadáveres
Como consecuencia, o montacargas traballa a un ritmo frenético, mobilizando moitos máis contidos dos inicialmente previstos. O aparello transporta comidas, roupa (sucia e limpa), pedidos, lixo e ata cadáveres de residentes "finados".
O comité demanda a modificación integral dos pisos superiores (3º e 4º) para adaptalos aos usuarios dependentes, a reforma da cociña, a finalización das obras do comedor do cuarto piso e a habilitación de comedores e salas de estar en todas as alturas.
As instalacións contan con 96 residentes, dos que a metade están considerados como pacientes dependentes
O persoal integra 24 auxiliares de enfermería, 19 camareiros-limpadores, sete ATS para os días laborables e outros para o fin de semana, á parte de persoal de atención non directa. O comité esixe que se aumenten todas as categorías e, sobre todo, que o médico estea operativo todos os días e que se cre un servizo de enfermería. Todo iso, dentro dun "cronograma oficial" que permita saber "como se van arranxar todos lestes problemas para dar un servizo adecuado", insistiu a presidenta do comité, Carmen Buján.
Montacargas sen risco
Política Social insiste en que a Residencia de Campolongo "cumpre as cocientes de persoal e garante unha atención da máxima calidade". Ademais, asegura que os ascensores funcionan con normalidade e que a última avaría foi resolta "en menos de 24 horas". Sobre o uso polivalente do montacargas, afirma que existe un informe sanitario que conclúe que a combinación de alimentos e falecidos "non implica un risco para a saúde". "Toda a comida vai selada, en carros e bandexas térmicas pechadas".
O comité e a consellería enfrontarán posturas nunha reunión prevista para o próximo 20 de marzo.
