A asociacion Vaipolorío celebrou este domingo unha dobre asemblea para facer balance de 2019 e repasar os proxectos do presente ano, ademais de convocar eleccións para a súa xunta directiva. Coa presenza duns 15 asociados, as sesións desenvolvéronse na Cultural de Salcedo, debido á adversa meteoroloxía.
Os presentes acordaron manter as campañas estivais dos seis domingos e deron o visto e prace a que se publique a terceira edición de O río da memoria. Cartafol do río dos Gafos, obra de Carlos Solla, debido ao éxito dos seus precedentes. Ademais, nesta ocasión incluiranse datos e informacións actualizadas que o autor foi recompilando.
A maiores, Vaipolorío colaborará nun novo catálogo dos cogomelos e fungos que se poden atopar nas marxes do río, unha das súas publicacións estrela con motivo dos 20 anos da asociación.
Os socios tamén deron o seu beneplático a participar nun master dun alumno da Universidade de Vigo sobre paisaxismo urbano ao redor do Gafos, aínda que a estrutura do traballo aínda está pendente de concretarse.
Algo similar ocorre co segundo proxecto académico do que se deu conta, en colaboración co ciclo medio da Escola de Capataces Forestais. "Aínda temos que pechar os contidos", matizou Gonzalo Sancho, presidente do colectivo.
A súa continuidade foi o único punto da orde do día da asemblea extraordinaria celebrada tamén este domingo. Sancho leva 14 anos á fronte de Vapilorío tras pasar por outros postos. "Pero estou encantado de poder seguir colaborando e traballando a prol deste grupo", manifestou, tras anunciar que xunto a el continuará o resto da directiva.
