Novo susto no centro da cidade como consecuencia dun incendio. O lume nunha campá extractora en Virxe do Camiño mobilizou este a os Bombeiros.
O suceso ocorreu pasadas as cinco da tarde nunha vivenda do número 31 desta rúa, que está enfronte do bolardo que marca aos peregrinos a distancia de 64,5 quilómetros que hai desde ese punto ata Santiago de Compostela. Ata a zona tamén se desprazou unha patrulla da Policía Local, que acompañou aos inquilinos do piso, que tiveron que abandonar o apartamento durante a intervención dos traballadores do servizo antiincendios.
O do domingo foi o terceiro incendio en tres días no que actúan os Bombeiros. O primeiro deles tivo lugar o venres pasado no interior dun establecemento comercial de Benito Corbal. Unha avaría nunha estufa provocou un conato na tenda, da marca Mango, xerando unha intensa fumareda.
Os funcionarios do servizo municipal utilizaron extractores para disipar o fume. A súa rápida intervención evitou danos no local, que estaba a piques de pechar cando se produciu este incidente.
A segunda intervención produciuse ao día seguinte. Cando pasaban 22 minutos do mediodía, os servizos de urxencia municipais acudiron á rúa Peregrina para extinguir o incendio que se declarou nun bazar, que ocupa o baixo dun edificio situado no número 55 do citado viario.
Os bombeiros traballaron durante máis de cinco horas para apagar as chamas, que se iniciaron nun almacén superior do establecemento Híper China. A volatilidade dos materiais plásticos deste comercio complicou as tarefas dos profesionais.
O incendio xerou unha intensa columna de fume "tóxico". O cheiro a queimado aínda era perceptible durante este domingo neste negocio.
En ningún dos tres incidentes houbo feridos, aínda que si danos materiais. Os de maior contía localizáronse no bazar chinés, no que se almacenaban artigos da próxima campaña do Nadal.
